Sawrkar laipuia Ministry of AYUSH buatsaih West Bengal leh hmarchhak state-te tana AYUSH programme-a hmalakna thlirletin Guwahati-ah inhmuhkhawm a ni a, Mizoram Health minister Dr R Lalthangliana pawh a tel.
Minister Dr R Lalthangliana hian kum 2014 atangin National AYUSH Mission hi Mizoramah kalpui tan chauh ni mah se, India ram state-a ‘small state’ zingah a titha ber an nih theih thu te, chumi avanga Ministry of AYUSH-in an duhsak bik zia te a sawi a. Khum 50 awm theihna tur Aizawla 50 bedded AYUSH Hospital sak an phalsak bakah khum 10 awmna tur Saituala 10 bedded AYUSH Hospital sak a ni dawn tih a sawi a. Sawrkar laipui duhdana Health Sub Centre 38, AYUSH Health & Wellness Centre-a hlankai vek a nih tawh thu leh tha taka an hna an thawh tawh thu te, NABH accreditation hmuh thuai an beisei thu te a sawi a ni.
“Mizoram hi ramngaw nei tha kan ni a, hmarchhakah pawh bio-diversity nei tha ber pawl kan ni. Chuvangin kan ramhnim leh ramhmul hi hmang tangkai tura tih tak taka kan tih chuan kan state economy thanna tur hmanraw pawimawh tak tur a ni. Hetianga ramhnim leh ramhmul damdawi siamna’n central lam hian kalphung a thlak hret a tula hriat a ni a. AYUSH hospital din belh a, doctor te pawh tun aia tam zawk lak belhna turin a bik taka ruahmanna siam a tul a ni,” a ti.
Thutkhawm hi AYUSH ministry secretary Rajesh Kotecha chuan kaihruaiin NE state-a AYUSH dinhmun report a pe a. Assam chief minister Himanta Biswa Sarma chuan state official-te lawmna thu sawiin, Minister of State for AYUSH Dr Munjpara Mahendrabhai Kalubhai leh Union Minister of State for AYUSH Sarbananda Sonowal ten thu an sawi bawk.
NE states leh W.Bengal Health minister-te an kal kim a. Mizoram Health minister tawiawmtu, principal secretary, Esther Lal Ruatkim’n Mizoramin National AYUSH Mission a kalpui dan, hmalakna hrang hrang leh hmachhawpte a report.
Health minister sawi thenkhat:
# State Medicinal Plants Board (SMPB) Mizoram-in research and development lamah nasa taka hma la in, Mizorama ram hnim damdawi awmte chu Mizoram University nen tangdunin an zirchiang thin a, neih chhunzawm zel an tum.
# Ram hnim damdawia hman thin riral mai tur leh vang tak tak thenkhat chu humhalh a nih theih nan SMPB leh Krishi Vigyan Kendra Department of Agriculture chuan nursery-ah tihpun hna an thaw.
# SMPB kaltlanga ramhnim damdawi a lo hlut a, awmze nei zawka chin pun leh hralh a nih theihna’n storage godown, processing unit, Rural Collection Centre leh value addition infrastructure ruahman belh zel a ni.
# Ramhnim damdawi chawilar na’n leh a hlutna inzirtirna’n district palia school 52-ah School Education department nen tangdunin School Herbal Garden siam mek a ni.
AYUSH programme bawhzuina thlir ho
