Daily Newspaper

Azerbaijan khawpui lian ber dawttu laipuiin sai

27

Azerbaijan khawpui lian ber dawttu Ganja chu Armenian forces ten an kap na hle a, Nagorno-Karabakh ramchhungah inbeihna nasa taka kalpui mek a ni.

Nagorno-Karabakh hi official chuan Azerbaijan ram a ni a, mahse, ethnic Armenians tena an luah leh awp a ni thung.

Azerbaijan sipai tena region capital Stepanakert laipuia an kah avangin Ganja military airport hi kap ve an nih thu an sawi a.

Azerbaijan chuan Ganja aiport chuan beih a tawh thu sawi nghalin tuna intihbuaina avang hian karkhat chung lekin mi 220 chuangin nunna an chan phah tawh a ni.

Armenia leh Azerbaijan te hi Nagorno-Karabakh vang hian kum 1988-94 khan an lo indo tawh a, inkahhaina an siam chungin inremna tluantling tun thlengin an la siam thei lo a ni.

Tuna inbeihna thleng mek hi inkahhaina an siam hnua inbeihna nasa ber niin Soviet republic ram hlui pahnih te hian buaina tichhuaktuah an inpuh tawn ve ve a ni.

Azerbaijan chuan an sipaite chuan khaw pasarih an laklet tawh thu an sawi laiin Nagorno-Karabakh chuan an sipai te chuan hma an sawn mek an ti ve thung.

Hetih lai hian Armenia chuan France, Russia leh US te atanga palai an awm a nih chuan inkahhai a awm theih nan inbiakna neih an duh thu an sawi thung.

Azerbaijan hi langsar takin Turkey-in a thlawp thung a, Armenian sipaite chu Nagorno-Karabakh atanga inlachhuak nghal turin a ti ve thung.

“Nagorno-Karabakh hi kan ram a ni” tiin Azerbaijan President Ilham Aliyev chuan TV kaltlanga ram mipuite hnena thuchah a sawiah a sawi chhuak a, Armenia chu ngaihdam dil turin a ti bawk.

“Hei hi a tawpna a ni a, tu te nge kan nih kan lantir ang a, ui ang maiin kan um ang,” tiin a sawi.

Nagorno-Karabakh thuneitute chuan Ganja military airport an tihchhiat thu an sawi a. An khawpui Stepanakert chu missile hmanga kah hmasak a nih thu sawiin Ganja airport chu Azerbaijan tena civilian area beih nana an hman an ti bawk.

Stepanakert beih a nih avangin khawpui pumah electricity a awm lo niin Armenpress news agency chuan a sawi a, mi tam takin khawpui an chhuahsan niin a tarlang bawk.

Seperatist region leader Arayik Harutyunyan chuan ‘tun atang chuan Azerbaijan khawpui liana military facility te chu defence army te target a ni tawh ang’ tiin a sawi.

Turkey chuan Ganja laipui hmanga beih hi sawisel nghalin ‘civilian te tumna’ a ti a. Armenian defence ministry thu-puangtu Shuahn Step-anyan chuan ‘Azerbaijan lam hawiin Armenia territory atangin eng silai mah kahchhuah a ni lo’ a ti bawk.

Armenia hian military leh economic lamah Nagorno-Karabakh hi official lovin a thlawp tlat thung a ni. Nagorno-Karabak official te chuan September 27 a buaina chhuah atangin an sipai 201 in nunna an chan tawh thu leh civilian thahnem takin an thihphah tawh thu a puang a. Azerbaijan chuan civilian 22 in nunna an chan tawh thu sawiin an sipaite nunna chan zah erawh a sawi lang ve duh lo thung.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy