Daily Newspaper

Babri Mosque case-ah puha ten thiamchang

35

Babri Mosque chhutchhiat kha ruahman lawk a ni lo tiin Uttar Pradesh a Special court judge chuan sawiin mi 32 te BJP leadfer LK Advani, Murli Manohar Joshi leh Uma Bharti te pawh telna chu thiam a chantir vek.

Kum 28 laia upa Ayodhya a Ram Janmabhoomi hmuna ding thin Babri Masjid chhut chhiat case a thuremna hi Lucknow ah special court in relin thutlukna a siam ta a ni.

Kum 1992 a Babri Masjid Mosque tihchhiat-naah khan Hindu activists sang tam tak te inhnam hnawihin December 6 ah chhutchhiat a ni a. Chhut chhiat a nih hma hian BJP leader LK Advani chuan rath yatras a nei awl lo a ni.

Court-in thutlukna a siam lai hian kum 92-a upa Avani, kum 86-a upa Murli Manohar Joshi leh Uma Bharti leh Kalyan Sigh te chu an tel lova mahse video conference hmangin an chhim thung.

Advani, Joshi, Uma Bharti leh Kalyan Singh te chauh hi he thubuai nei mi 32 zinga la dam awmchhun te an ni tawh a, criminal conspiracy leh inhuatna tuha puh an ni.
Advani, Joshi leh Uma Bharti te hi mosque tihchhiat ni khan a bul hnaiah an awm tia puh an ni a. Investigating agency te chuan an thusawi hmangin mipuite an fuihpawrh an ti a ni.

Khatihlai khan Kalyan Singh chu Uttar Pradesh Chief Minister a ni a. Mosque tihchhiat hnuah India ram hmun hrang hrangah buaina a chhuaha mi 3,000 chuangin nunna an chan phah hnuah a sorkar chu thiahsak a ni zui a ni.

Union Minister hlui Uma Bharti, Covid-19 a kai avanga Uttarakhand damdawi Ina enkawl mek chuan a hma niin BJP chief JP Nadda hnenah thiamloh chantir a nih chuan bail a dil loh tur thu ziakin a lo hriattir tawh bawk.

Advani hi special CBI court chuan July 24 khan video conference hmangin thu an zawt a, special judge-in zawhna 100 chuang a zawt a, a hma niin Joshi pawh hetianga zawhfiah thu niin an pahnihin an puhna te chu an hnawl ve ve a ni.

Kum 28 chhungin he case hian buaina leh harsatna hrang hrang a tawk a. A tirah 1992 khan case pahnih ziah luh niin a hnuah chuan he mi kaihhnawiha case ziahluh chu 49 a tling hial a ni. Case ziahluh pahniha FIR no 198 ah chuan Advani, Joshi leh Uma Bharti te chu sakhuana inhuatna kalpuia thehdarhah leh buaina siam tura midangte fuih-pawrhah puh an ni.

Kum 1993 khan Central Bureauof Investigation chuan case pakhat mi 48 te lakah ziaklutin chutah chuan Shiv Sena dintu Bal Thackeray leh Kalyan Singh te pawh an hmer tel bawk.

Advani, Joshi leh Uma Bharti te case hi Lalitpur atangin Rae Bareili-ah chumi hnuah Lucknow ah Supreme Court thupek angin sawn a ni bawk.

Kum zabi 16-naa sak Babri Masjid Mosque kha ‘Kar Sevaks’ sang tel te chuan a dinna chu Lord Ram a pianna hmun tiin an chhu chhia a ni.

Nikum November thla khan Supreme Court chuan thuremna siam bawkin Babri Masjid dinnaah Ram Temple sak a remti bawk a. Temple sak lungphum pawh kumin kum tir khan phum niin Prime Minister Narendra Modi pawh a tel a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy