Badam chin chhin sengpui
Krishi Vigyan Kendra (KVK), Chawnhu Lawngtlai-in kumin June 25-a Lalnunzira rama ‘Cluster Frontline Demonstration (CFLD) on Groundnut (Girnar-4 variety)’ kaltlanga badam chi an lo chin tawh chu Thawhelhni khan a seng runpui neih a ni a. Lawngtlai bawrhsap Cheemala Siva Gopal Reddy chuan a hmanpui.
Loneimite ngaipawimawha KVK-in theihtawp a chhuah thin chu fakawm a tih thu sawiin, Lawngtlai district chauh ni lo, Mizoram pum huap pawhin ei leh barah state pawn atanga lakluh a tam em em a, mahni intodelh tura ke pen a hun takzet tih a sawi.
Lawngtlaiah iron tlakchham avanga natna (Anemia) a hluar hle tih bawrhsap hian sawiin, ei leh inah fimkhur a tul a, thlai chikhat chauh ni lo, chi hrang hrang ei a pawimawh a, he natna laka fihlim tur chuan badam ngei pawh hi a tangkai hle tih a sawi a ni.
Tun tuma seng badam hi Biofortified Groundnut (Girnar-4 variety) a ni a, kum 2020 khan ICAR- Directorate of Groundnut Research-in a siamchhuak a. He badam-ah hian oil content a sang bik a, mihring tana ei tur tha (nutrients) a tam bakah oil siamchhuahna tha tak a ni. Girnar-4 variety Groundnut hi ni 110-115 inkarah puitlingin an seng theih tawh a ni.
Badam chin chhin sengpui
