Bail-in Sri Lankan president hlui chhuah
Sri Lankan court chuan an president hlui, Ranil Wickremesinghe-a chu an ram a hruai laia sorkar pawisa hmang dik lova puhna avanga kar hmasaa an man hnuah Thawhlehni khan bail-in a chhuah.
Kum 76 mi, Wickremesinghe-a hi Thawhlehni khan sorkar damdawi ina an dahna hmun atangin Zoom hmangin court-ah a inlan.
A thubuai hi kum 2023-a Britain-a a zinnaah sorkar sum $55,000 hmanga puhna a ni a, a zinnah hian a nupuiin university-a honorary professor nihna a lawmna a hmanpui a ni.
Colombo Fort Magistrate Nilupuli Lankapura chuan Wickremesinghe-a chungthu hi venhimna khauh tak hnuaia rei tak a ngaihtuah hnuah Rs. maktaduai nga bond daha chhuah lailawk turin a ti a ni.
Colombo lailia court-a a chungthu ngaihtuah a nih lai hian amah thlawptu za tel leh eptu politician tam tak an pungkhawm.
Nikum inthlana chak lo, Wickremesinghe-a kaihhruai, United National Party (UNP) chuan an hotupa hi engmah tihsual nei lo a nih thu leh a laka thubuai siam pawh politics vang niin a sawi a. Sri Lanka-a rorel lai hruaitu, President Anura Kumara Dissanayake chuan hei hi a pha thung.
Dan hre mi, Wickremesinghe-a hi Sri Lankan prime minister pawh vawi ruk ni tawhin kum 2022 atang khan president a ni.
President hlui hian Britain-a a zinnaah hian a nupui pawisa a hmang a, sorkar pawisa hman a nei lo niin a insawi.
Dissanayake-a hian an rama ei rukna um bo tumin a bei a, kum 2022-a an ram eibar chhe vek tun din tumin a bei nasa hle.
Bail-in Sri Lankan president hlui chhuah
