Bairabi-ah chhungkaw 21 inthiarchhuak

Ruah sur nasa avanga Tlawng lui lianin Bairabi khua hmun thenkhata harsatna a thlen a, chhungkaw 20 chuang an inthiarchhuak.
Nilaini khan Kolasib district bawrhsap John LT Sanga a hmunah a endik a. Bairabi khawtlang hruaitute nen tui lian avanga harsatna tawk chhungkuate chhawmdawl dan tur relin an thukhawm. Bawrhsap chuan chhiatna a thlen changa a tul apianga che chhuak thin khawtlang hruaitute leh tlawmngai pawlte chu khawtlang mipuiin an thlamuanpui hle a. Sawrkar hmalaknaa chhanchhuah, tanpui leh chhawmdawl hna tihlawhtlingtute leh tichaktute an ni tih a sawi. Chhawmdawl hna thawktute mamawh zual phuhruk nan sumfai leh silpouline engemawzat a hlan a ni.
Bairabi khawtlang hruaitute sawi danin, tui lian avang hian May 28 zan thlengin chhungkaw 21 chu hmun him lamah sawn chhuah an ni tawh a. Tui lianin lawng a lak bo loh nan tlaivarin vengtu an indah. Tlawng lui hi kum 1989, 2008, 2017 leh 2018 khan nasa takin a lo lian tawh a, hei vang hian kumin fur lo thleng turah pawh khawtlang hruaitute an lo inhmakhua lawk tih an sawi. Vanneithlak takin kumin hian chhiatna liamtham thleng a awm loh thu leh chenna in chan an awm rih loh thu an sawi rualin, tui lian hian Tlawng kama huan siam thahnem tak a tichhia a, ruah a sur belh rih loh avangin tui pawh a kam ve zel tih an sawi a ni.
Thawhlehni zan khan Bairabi Joint VC leh all NGO chu an lo thukhawm tawh a. Inbuatsaih lawk a, mite tanpui thei tura inralring turin an inchah. Tlawng lui dunga huan lo ram nei leh eizawngte tui len chhung chu chhuak vak loa inveng turin an inchah a; tuilian tuarte khawsak lailawkna tur, Relief Camp chu YMA Bairabi North leh South Branch-in lo ruahman lawk tura tih an ni.