Daily Newspaper

Bairabi Screening Point sawn ngen

36

Kolasib bialtu MLA, minister K Lalrinliana chuan Covid-19 hrileng do nana hmalakna pakhat, Bairabia lirthei lolut khalhtute endikna – screening point chu sawn turin khawtlang hruaituten an lo ngen angin, a thar sakna tur hmun a enfiah.

Minister hian Bairabi Medical Team leh VLTF hruaitute kawmin an harsatna a sawipui a. Covid-19 dona kawnga Bairabi khawtlang hruaitute leh thawktute thawhrimna leh inpeknaah lawmthu a hrilh. Bairabi VLTF hruaituten an lo thlen tawh angin, screening point chu mihring chenna awm lohna hmunah sawn tura hma lak a nih theih nan a bultan nan Rs. 20000 a hlan a ni. Medical Team ten thawktu indaihlohna an lo thlen pawh Health minister a sawipui tawh thu a sawi a, rang taka hma lak thuai a nih tur thu a sawi.

Mizoram Timber Transporter Association hruaituten Supply minister hnenah hian harsatna an lo thlen a. Tuna Bairabia thing dahkhawl sa thawnchhuah theih chhung chu kumin September 30 thleng chauh hun a awm tawh laiin, thing chhekkhawl sa wagon 189 vel a la awm a, Covid-19 vanga a hun taka thawn chhuah thin a nih loh avangin thing thawnchhuah tur tam tak hlutna a tlakhniam thu an sawi a, labour lamah harsatnate an tawh bawk avangin a thawnchhuah nan thla hnih tal hun pawhsei sak a tul tih an lo thlen a ni.

Kolasib SMO Dr RK Lalthlamuana sawi danin, Bairabi Screening Point-ah hian medical officer pakhat leh laboratory technician pahnih an duty a, staff 4 dahbelh tura ruahman mek a ni. He Screening Point kaltlang mi 13813 endik a ni tawh a, kumin September 12 atangin Rapid Antigen Test neih tan niin mi 446 endik an ni tawh.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy