Bal-in nu hnute tui a titam tih finfiah

Bal-in nu hnute tui a titam tih finfiah
Bal/ ba in nu hnute tui a ti tham thei tih zirchianna atangin finfiah a ni a, ba chhum chu ei atana tha bera ngaih a ni.
Mizoten thlai zinga kan ei lar tak bal hi chaw tha a nih bakah nu hnute tui a ti tam thei tih sawi a awm avangin Mission Foundation Movement chuan zirchian tul a ti a. Sawrkar laipui Ministry of Tribal Affair hnuaia Support to Tribal Research Institute scheme hnuaiah kum 2022- 2023 chhung khan Social Welfare & Tribal Affairs department kaltlanga research hi tih niin, Nilaini khan Social Welfare minister Lalrinpuii’n zirbingna report bu hi a tlangzarh.
He zirbingna hi Laithangpuii College of Pharmacy faculty leh research team-in kum khat chhung an bei a. Mizoram University, Mizoram Food Processing Research and Training Centre, RIPANS leh NIPER Guwahati ten technical support an pe a ni.
He research tum ber chu, balah hian nu hnute tui ti tam theitu compound-a awm dan zirchian a ni a. Compound awm zawn chhuahna atan hian preliminary phytochemical screening leh liquid chromatography- mass spectroscopy hman a ni a. Nutritional composition hi Association of Official Analytical Chemists-in a recommended method hmanga zawn a ni. Compound hmuh chhuah zirchiannan computer-based study-ah hian Schrodinger software hman a ni.
Zirbingna in a hmuhchhuah tlangpui chu – balah hian compound thenkhat, alkaloids, flavonoids leh glycosides a awm tih hmuh a ni a. Heng compound hi mihring tana chakna a thlen theih piahlamah nu hnute tui a ti tam theia ngaih a ni. He compound hi thendarh a, zirchiannaah chuan natural compound Luteolin 6, 8-C-diglucoside a awm tih hriat a ni a. Computer-based studies neihnaah he compound hi mihring taksaa receptor-ah a bei thei a ni tih zirchhuah a ni a, chu chuan hnute tui a ti tam thei tura rin a ni.
Bal nutritional value hi chi thum chips, powder leh chhuma test a ni a. Hetah hian bal chhum hi regular taka ei atan a him bakah chaw tha a awm tih hmuh chhuah a ni a. Bal chhum hi Zemabawk Veng chhunga nu hnute tui pe lai mi 30 hnenah gram 100-in nitin thla hnih chhung pek a ni. Hemi chhung hian kartin survey neih thin a ni a, chutah chuan 57% in an hnute tui a tipung tih hmuh chhuah a ni a, hnute tui nei ngai lo pathum zinga pakhatin a neih phah bawk.