“District khat, thar chhuah chi khat” (One District One Product) tih hmalakna hnuaia Lunglei district-in thei a tharchhuah atana thlan, balhla thar leh sawngbawl chungchanga hmalak dan tur sawihoin Ningani khan district bawrhsap Navneet Mann hoin an thukhawm.
Thutkhawmah hian bawrhsap office bakah line department – Horticulture, Agriculture, Industries, Cooperation, DRDO, ITI, SIRD, NIC leh I&PR aiawhte leh balhla hmanga sum chang thil siamchhuaktu entrepreneur pathum an tel. Entrepreneur pathum – Vanlalzami Ralte (Bawbawihi Food Processing), Pc Lalngaihsanga (Pachuau Banana Chips) leh F Ramfangzauva (Rafa Pro Biotics Juice) te hian balhla leh thei dang hmanga kamram (chips), chhangphut (flour) leh umtui (juice) an siam chu pho chhuakin, hma an lak dan an sawi a ni.
ODOP hnuaia Lunglei district-a balhla thar chhuah leh balhla atanga thil siam chhuah tipung a, balhla chingtu leh balhla hmanga thil siam chhuaktu tam zawk an awm theihna atan leh, a hmanrua, a hralhna leh thil pawimawh hrang hrang ngaihtuah dan sawiho a ni.
Lunglei district tharchhuah balhla leh balhla atanga thil siamte vawrhlar a nih theihnan internet leh media hrang hrang kaltlanga pho chhuah thin nise tih niin, sawrkar leh pawl hun hmanna hrang hrangah tualchhung thar chhuah ngaihhlut leh hman tam nise, tih a ni. Balhla hmanga thil siamtu tam zawk an awm theihnan a tuimite a theih ang anga hma lakpui bakah training leh workshop buatsaih rel a ni.
Balhla leh thildang hmanga ei/in tur siamtute nen sawiho
