A ti thang lo tan chuan ball han sêp kual vel hi thil harsa tak a ni a, ball pet thang tan pawh an ke mai bakah âwm bawr, koki leh lu te hmanga ball han tihkual vel hi an ball control hnehsawh zia entir nan a te pawh an tha thin viau awm e.
Swedish tlangval Daniel Yaakob hi chuan darkar 24 chuang leia titla miah loin ball a sep char char thei a, Guinness World Record a siam. Yaakob hian Rydshallen sports complex, Linkoping, Sweden-a gymnasium-ah record hi siamin, a ke, khup, lu leh âwm hmangin ball a sep char char a, ball chu lei a tla miah loin darkar 28 leh minute 21 leh second hnih a sep thei.
A hmaa hetiang record siamtu chu Dan Magness (UK) niin, darkar 26 ball a sep ve thung a, ani hi chuan Muse Production Limited buatsaihin, Olympian City, Hong Kong-ah 2010 khan record a siam ve thung.
Daniel Yaakob hian zing dar 4 atanga bei tanin a ke, khup, awmle li te hmangin ball chu a sep kual ta char char a, eng emaw trick danglam deuh tak a tih pui lem lo a, ball a tlak a, lei a tawk fuh palh hlauh a nih chuan a bul atanga a tan that leh a ngai dawn tlat a, chuvangin ball sep pangngaiin a tikual deuh char char a ni deuh ber.
Guinness guideline-ah chuan darkar thum ball sep apiangin minute 15 chawlh an nei thei a, hemi chhung hian zunram thiar bakah ei leh in te an tih vek hman a ngai.
Ball sêp rei thei record siam
