Manchester United defender hlui Patrice Evra chuan Lionel Messi aiin United a alo khelhpui tawh thin Cristiano Ronaldo tha a tih zawk thu a sawi nawn leh a. A thian tha Ronaldo anga thawkrim ni se Messi hian Ballon d’Or 15 lai dawng thei tur a nih thu Evra hian Rio Ferdinand-a YouTube channel ‘FIVE’ ah a sawi.
Football khel mek zinga ropui fal pahnih; Lionel Messi leh Cristiano Ronaldo teah hian tu nge tha zawk tih inhnialna a awm reng a, an la inhnial zui zel bawk. World Cup 2022-ah Argentina an champion a, Lionel Messi hi World Cup best player a nih nawn leh chiah khan mi tam tak chuan tha zawk chungchanga inhnialna tawp taah an ngai a. Fans tam tak leh pundit thenkhatte pawhin Lionel Messi hi footballer ropui ber (GOAT) ah an pawm thei hlawm. Chutihlai chuan Evra erawh chuan Messi aia Ronaldo tha a tih zawk thu a la sawi chhunzawm ve zel thung.
Evra hian Messi aia Ronaldo tha a ti zawk zui zel hi inthlahrunna chin a nei ve a ni mai thei, “Messi aia Ronaldo ka thlang zawk reng mai hi a chhan sawifiah ka duh. Hei hi in unauna leh inthian thatna thil a ni lo. Ronaldo hi chu a thawhrim chungchuang na hi ka duh em em a ni. Messi hi Pathianni thiamna ril bik a pek tih ka pawm thlap a. Ronaldo erawh hi chuan a thiamna leh a hlawhtlinna zawng zawng hi thlantui far zawih zawih chunga a zirchhuah, a thawhrim vang liau liau-a a neih leh a theihna a tihpun a ni ve thung. Ronaldo thawhrim ang chiah hian Messi hi thawkrim ve ta se Ballon d’Or 15 lai a dawng thei ngei ang”, a ti.
Ballon d’Or panga ngawt dawng tawh Cristiano Ronaldo hi taima leh thawkrim em em mai a ni a. A khelhna club-ah player ropui leh lar ber ni bawk mah se a inthlahdah ve ngai lo. Traning ground thleng hmasa ber a ni fo thin a. Thleng hmasa ber ni fo thin mah se haw tlai ber a ni deuh ziah thin niin an sawi. Free-kick te hi a zir taimak em vang a thiam chhoh tak niin a sawi a. A khelhpui ten training ground an chhuahsan vek hnuah pawh free kick a la zir tlauh tlauh thin. Player ropui, hausa tawntaw ni chunga a thawkrim em em reng mai hi Cristiano Ronaldo duhtu ten an duh em em chhan a ni a. Chung zingah chuan United leh France defender hlui Patrice Evra hi a tel.
Ronaldo a thawhrim a, a inzir peih em em lai hian Messi erawh hi chuan free kick pet te hi a hranpain a zir ngai hauh lo thung an ti ve tlat thung. Training an am fal bik chang pawh nei hran ngai lo niin an sawi a, player taima leh thawkrim tia sawi a ni ngai meuh lo. Hei hian Pathianin thiamna a pek bik an tih thin hi a tak a ni tih a nem nghet. Heti chunga Ballon d’Or vawi sarih ngawt a dawng thei hian Messi hi thiamna chungchuang nei a ni tih a nem nghet a. Evra sawi ang hian Ronaldo thawhrim ang hian thawk rim ve se Ballon d’Or vawi 15 lai a dawng lo ang tih a sawi theih miah lo…!!!
Ballon d’Or 15 dawng thei tur Messi – Evra
