Footballer mimal chawimawina ngaihhlut hlawhberte zinga mi men’s Ballon d’Or dawng thei tur mi 30 an tarchhuak a, England player paruk ngawt an tel.
2023 Ballon d’Or dawngtu Lionel Messi kha record siama he award dawng ngun ber niin, vawiriat ngawt a hawn tawh a, mahse, Europe pawn lamah a khawsa ta te a ni bawk a, 2024 Ballon d’Or dawng thei tur 30-man shortlist zingah tum nga dawng ve tawh Cristiano Ronaldo nen an tel ta lo.
Englishman zinga nominee ni phate chu England captain Harry Kane, midfielder pathum – Jude Bellingham, Phil Foden leh Declan Rice-te bakah forward pahnih Bukayo Saka leh Cole Palmer-te an ni.
England hian Euro 2024 final lutin, kumin July ni 14 khan Berlin khawpuiah Spain chuan 2-1-in an hneh a, champion zo ta chiah lo mah se kum 2024 chhunga ‘best male footballer’ chawimawina dawng thei turin an player paruk ngawt chhawpchhuah an ni.
Premier League-a pakhatna leh pahnih Manchester City leh Arsenal chuan belhkhawmin player pariat ngawt an thehchhuak ve bawk.
Lawmman dawng thei tura rinkai langsar zingah Spain leh Barcelona rawlthar winger Lamine Yamal a tel a, kumin July thlaa kum 17 tling ve chauh Yamal hian Euro 2024-ah an ram a champion-pui.
Tarlan tak angin, kum 2003 hnu lamah tun hi nominee zinga Messi emaw Ronaldo emaw an lan phak loh tumkhatna a ni.
Argentina leh Inter Miami forward Lionel Messi hi tunah kum 37 mi niin, Cristiano Ronaldo hi kum 39 a ni thung a, an tlatna mualah huhang la neilian teh mah se an veteran nihna a lang ve tan ta a tih theih ang!
He chawimawina lo dawng ve tawh dang pahnih Karim Benzema leh Luka Modric-te pawh kumin nominee zingah an lang lo bawk.
He award dawngtu tur hi Fifa men’s world ranking-a top 100 luah ram atanga journalist thlanchhuah rualin vote hmangin an thlangchhuak ang.
Manchester United player pahnih Kobbie Mainoo leh Alejandro Garnacho-te chu best men’s young player of the year chawimawina ‘Kopa Trophy’ dawng thei tura chhawpchhuak niin, best goalkeeper lawmman ‘Yashin Trophy’ dawng thei tur zingah Aston Villa keeper Emiliano Martinez a tel bawk.
Premier League title latu Manchester City manager Pep Guardiola chu men’s coach of the year award dawng thei tur zingah a tel.
Award hrang hrang dawngtute hi October ni 28 khian Paris-ah puan a ni ang a, trophy hlan an ni nghal ang.
Ballon d’Or nominee-te
Jude Bellingham (England & Real Madrid)
Ruben Dias (Portugal & Manchester City)
Phil Foden (England & Manchester City)
Federico Valverde (Uruguay & Real Madrid)
Emiliano Martinez (Argentina & Aston Villa)
Erling Haaland (Norway & Manchester City)
Nico Williams (Spain & Athletic Bilbao)
Granit Xhaka (Switzerland & Leverkusen)
Artem Dovbyk (Ukraine & Roma)
Toni Kroos (former Germany & Real Madrid)
Vinicius Jr (Brazil & Real Madrid)
Dani Olmo (Spain & Barcelona)
Florian Wirtz (Germany & Leverkusen)
Martin Odegaard (Norway & Arsenal)
Mats Hummels (Germany, free agent)
Rodri (Spain & Manchester City)
Harry Kane (England & Bayern Munich)
Declan Rice (England & Arsenal)
Vitinha (Portugal & Paris St-Germain)
Cole Palmer (England & Chelsea)
Dani Carvajal (Spain & Real Madrid)
Lamine Yamal (Spain & Barcelona)
Bukayo Saka (England & Arsenal)
Hakan Calhanoglu (Turkey & Inter Milan)
William Saliba (France & Arsenal)
Kylian Mbappe (France & Real Madrid)
Lautaro Martinez (Argentina & Inter Milan)
Ademola Lookman (Nigeria & Atalanta)
Antonio Rudiger (Germany & Real Madrid)
Alejandro Grimaldo (Spain & Leverkusen)