Daily Newspaper

Ballon d’Or phu ber Jorginho

145

Chelsea leh Italy striker hlui Gianfranco Zola chuan a hnampui leh a club hlui Chelsea player pawimawh Jorginho chu chawimawina sang; Ballon d’Or phu ber a nih thu a sawi a. “Messi leh Lewandoski te dah tha in, Jorginho hi dawntir mai teh u” a ti.

Football-a mimal chawimawina ngaihhlut hlawh ber Ballon d’Or hi december thlaa sem tur a ni a. Chawimawina dawng tur inrinsiak hun lai a ni. Kum 2021 a chawimawina sang dawng tura rinkai zingah Jorginho leh Lionel Messi te hming a ri ring hle. Barcelona manager Ronald Koeman chuan Lionel Messi-a’n a phu bera a ngaih thu a sawi tawh a. Hemi hnu hian Zola chuan Jorginho chu Ballon d’Or dawn phu ber a nih thu a sawi ve leh.

Italy leh Chelsea holding midfielder Jorginho hian football club inelna ngaihhlut hlawh ber Champions League-ah Chelsea a champion pui a. FA Cup final a hruai thleng bawk. UCL-ah an champion a, FA Cup final an luh thleng hi chuan Blues tana a khelhpui N’Golo Kante hming a ri ring zawk a, Ballon d’Or dawng tura rinkai zawk a ni rih. He ngaihdan hi Euro 2020 khelh zawh a nih hnuin a inthlak danglam ta hlawk thung.

Euro 2020-ah Kante khelhna France an chetha tawk lova, quarter-final an lut zo lo. Hetihlai hian Jorginho-a khelhna Italy erawh chu England hnehin an champion thung. Semi-final-a Spain an hmachhawn tumin Jorginho hian chakna goal a thun a. England lakah chakna goal thun theihna hun tha nei zui leh mahse a thelh hlauh thung. Champions League leh Euro-ah a team a champion pui vangin Ballon d’Or dawng tura rinkai a ni thar a. Trophy lak atanga teh tur a nih chuan Jorginho hian a phu ber ni pawhin a ngaih theih ve bawk. Italy leh Chelsea striker hlui Zola chuan, “tun tum na n^ na chu Jorginho hian Ballon d’Or hi a phur ber e. Messi leh Lewandoski te theihnghilh in, chawimawina sang hi pe mai teh u”, tiin a hnampuiin chawimawina sang a phu zia a sawi.

Jorginho hian trophy lian pahnih la kawp bawk mahse mimala chetha Lionel Messi leh Robert Lewandoski te ang em chuan a boruak a lian tawk lo thung a. Ballon d’Or dawng tur meuh chuan rin a la har rih deuh. Barcelona leh Argentina fachuam Lionel Messi hi a chetha leh pek hle. La Liga-ah top-scorer a ni a. Barca hi Copa del Rey-ah a champion pui. Kum dang zawng zawng aiin ram tan a chetha a, Copa America-ah Argentina a champion pui a, top-scorer leh Best player an i kawp. Ram tan trophy lian a lak tak nawlh vang hian Ballon d’Or dawng turin rin a kai leh zual sauh a. A vawisarih nan chawimawina sang a dawn leh nge nge a rinawm hle.

Bayern Munich leh Poland tana chetha tak Robert Lewandoski pawh Ballon d’Or dawng tura rinkai ber pawl a ni bawk. Kum 2020-ah mimal chetha fal, inelna pathuma Bayern Munich champion puitu Lewandoski a vanduai a. Ballon d’Or dawn theihna hun tha tak a neih kumah chawimawina sem a ni lo hlauh. Season liam ta khan Bayern tan goal 48 zet a thun a, Bundesliga-ah a champion pui. Euro-ah chetha bawk mahse last 16 an inhlangkai zo lo thung. Chawimawina sang dawng turin Jorginho leh Lionel Messi te nen hian an intlansiak fak ngei tura ngaih a ni a. Inelna boruak a nung tha viau ngei ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy