Balloon kahthlakah ngaihdam dil dawn lo

US President Joe Biden chuan US tuipui kama Chinese spy balloon nia hriatte an kahthlakah ngaihdam an dil dawn loh thu a sawi.
He balloon hi inenthlak nana hman a ni tiin a sawi a, mahse, balloon dang pathum an kahthlak tel te chu spy nana hman nia a lan loh thu a sawi thung a.
US chuan hetiang vansanga balloon thlawk ang chi te tun atang chuan fimkhur zawkin a ngaihven tawh dawn tiin a sawi bawk.
Biden chuan balloon kahthlak chungchang hi China President Xi Jinping hnenah hun rei lo te hnuah a sawipui tur thu a sawi bawk a.
“He thil hi chiang taka kan chinfel theih ka beisei a, mahse, balloon kahthlakah ngaihdam dilna kan siam dawn lo,” tiin Biden chuan White House ah a sawi a.
China chuan balloon te chu inenthlak nana hman nia an puhnaah a pha a, balloon te chu weather dat lakhawmtu tia sawiin kal peng palh tiin a sawi ani.
Mahse Biden chuan US official tena balloon 50,000 ft vela sanga tlawk leh US fighter jet tena Atlantic tuipui chungzawna a awm laia an kahthlak chu spy na atana hman a ti ve thung.
US chuan he mi chngchangah hian China chu a biahpawh reng thu sawiin, “Cold war thar kalpui tumna kan nei lo” tiin Biden chuan a sawi.
Biden chuan Alaksa, north-west Canada leh Lake Huron chungzawna thlawk balloon pathum an kahthlak te chu private comapny te, crecreation leh research institution lam kaihhnawih niin a lang a ti thung a.
Tunah erawh heng balloon ang te eng nge a nih hriatchian theih mai silohin US vansang luta duhthala an thlawk chu chhuizuia khauh zawka thil kalpui a nih tur thu a sawi bawk.
Biden chuan hun dangah pawh nise American mipuite him nana balloon ang te chu a kahthlak tir leh tho tur thu sawiin, “American mipuite tana him lo nia kan ngaih a nih chuan kan kapthla zel ang” tiin a sawi bawk.