Bana Kaih-ah Homestay
Scheme kan ruahman tel
– Tourism minister
Sawrkar chuan Bana Kaih hnuaiah ‘homestay scheme’ an duang tel a, khualzin thlenna atan home stay an uar dawn tih Tourism minister Lalnghinglova Hmar chuan a sawi.
Thawhtannia ZPM office-a thu a sawinaah minister chuan, an hunlaiin rel a lo thleng thut a. Aizawla hotel pangngai deuh chin an zawhchianin, room a awl meuh lo a, hei hian Mizoram-a tourism hmasawnna a entir tih a sawi.
Tunah tourism project khawih mek leh thawh hmabak, sanction awm tawh an neih zat belhkhawm chu cheng nuai 34990.9 niin, hemi bakah Mizorama tourism project lian ber zing ami ni thei tur, sum liantham pawh a lo luh zel an beisei mek tih a sawi a ni.
Heng project aia a ngaihpawimawh leh tourist hip tura a ngaih zawk chu, khualzin kan lawm dan, dawnsawn dan, an tlawh duh tur hmunhma kan sawngbawl dan, an lo kal duhna tura ‘event’ kan siam thiam danah a innghat dawn tih sawiin, “Sawrkar hi sumdawng a ni loa, hlawk a tum loa, mipui hlawk se a duh. Home stay kan uar dawn a, Bana Kaih hnuaiah homestay scheme kan duang. CSR atangin sum hlawm lian deuh home stay atan kan nei dawn bawk. Event kan nei tha sawt hle a, vantlang mipui tan community based tourism kan duh a ni a, a hlawkna mipuiah zel kal rawh se,” a ti.
Hnahsin Kutah sawrkarin nuai 30 chuangin a pui a. Stall inhralhna cheng nuai 200 a tling a, mipui nuai chuangin an tlawh a, sum chevel cheng vaibelchhe 15 vel niin an chhut tih Lalnghinglova Hmar hian a sawi. Hotel, guest house, home stay-a thleng zat Mizoram chhung mi 5100, India ram state dang mi 805, India pawn mi 56 an tling tih a sawi a ni. Sakawrhmuituai Sunset (December 31), Phuaibuang Paradise (January 6&7), Aizawl International Half Marathon (February 14), Chapchar Kut an la hmabak tih a sawi bawk.
Bana Kaih-ah Homestay Scheme kan ruahman tel – Tourism minister
