Sawrkar kumthar 2024- 2025 budget-ah ‘Bana Kaih’ (Handholding policy) kalpuina atan sawrkarin cheng vaibelchhe 150 a dah dawn.
Zirtawpnia Aizawla Republic Day hmannaah larsap Dr Hari Babu Kambhampati chuan a sawrkarin kumthar 2024- 2025 budget atan cheng vaibelchhe 150 chu ‘Bana Kaih’ (Handholding policy) hnuaiah kuthnathawktute pualin dah a ni dawn tih a sawi a. Bana Kaih hmalakna hi kuthnathawktu mahni kutkawiha eizawngte leh small scale industry-ten hmathar an lak theih nana an sum mamawh phuhruk tura ruahman a ni tih a sawi.
Mipui zingah leh a bikin agriculture leh industry-a eizawngte tan hamthatna tam ber an chan theih nan he policy hi sawrkar laipui hmalakna kal mekte nen thlunzawm theih dan tur enzui a ni tih a sawi bawk.
Police checkgate thenkhatah dan kalha thil tih awm thin khuahkhirhnan heng hmuna police duty zawng zawng chu thupek khauh taka zawm tura hriattir an ni tih larsap hian a sawi a. Thupek pawisa lo an awm a nih chuan sawrkarin a ngai thutak hle dawn, tiin, an chungah khauh takin dan lekkawh a ni dawn tih a sawi.
“Mizoram sawrkarin ramri kana dan kalha sumdawnna chi reng reng a enliam ngai dawn lo a. Kuhva rah tawlhruk titawp turin sawrkar leh dan kengkawhtu hrang hrangin ngawrh takin an thawk mek zel a ni,” a ti. Fertilizer dealer-te chu an licence uluk taka enfiah mek niin, licence hmangsual hmuhchhuahte chu tihtawp sak zel an ni dawn tih a sawi a ni.
Sawrkar kum kal mek chhungin lei tan tum a ni a, hemi tur hian sawrkarin cheng vaibelchhe 110 a dahhrang tawh tih larsapp hian a sawi a. Private agency-te nen sawhthing metric ton 500 leh hmarcha metric ton 100 loneitute hnen atanga leisak turin thawhhona thuthlung ziahfel tih a sawi bawk.
Bana Kaih kalpuina’n vbch. 150 dah dawn
