Bana Kaih loan latu zinga rul
tha lo tarhchhuah zel a ni ang
– Adviser to CM
Eizawnna bul tan turte tana sawrkarin loan (entrepreneurship handholding) lak theih turah loan rul tha leh duh lo chu Handholding website-ah tarchhuah zel an ni anga, bank atanga loan an lak theih tawh lohna turin hma an la dawn tih adviser to chief minister (Handholding) Dr KC Malsawmzauva chuan a sawi.
Thawhtannia ZPM party office-a inkhawma thusawitu Dr KC Malsawmzauva chuan, eizawnna bul tan turte tan loan (entrepreneurship handholding) hi kan thalai mahni kutkawiha eizawn tumte bul tanna tur leh an hmalakna tilian tura sum hlawm mamawh tana a ruahman a ni tih a sawi a. A bultanna atan bank pathum – State Bank of India, Mizoram Rural Bank leh Apex Bank nen he project-ah hian an thawkho dawn tih a sawi.
“He scheme hnuaiah hian pawl leh mimal angin a inziahluh theih a, pawl aiawha hming ziakluttu pawhin mimal ang pawhin dilna a hranin a thehlut thei tho dawn a, chutih rualin mimal project a nih chuan mipakhatin dilna pakhat bak a thehluh theih loh.” a ti.
Handholding scheme hi ram siamthat tumna project a nih avangin party politics anga kalpui a rem ve lo tih adviser to CM hian a sawi a. Tun atanga kum 5-ah chuan he scheme rah chhuah hmasawnna thar chu hmuh ngei an inbeisei a, kalphung thar mipui sawrkarin danglamna leh hmasawnna a thlen ngei ngei a ngai a, an hlawhchham thiang lo tih a sawi.
“He scheme hnuaia thlan, bank interest rul thate chu kum chanve (thla 6) dan zelah sawrkarin interest an lo pek zawng kha a pe let thin dawn a. Sawrkar tana thawhpui tlak loh, mirinawm lo an awm a nih chuan, loan rul tha lo te hming sawrkarin Handholding website-ah a tarchhuak dawn a, bank hrang hrangah loan an la leh thei tawh lo ang,” a ti.
Adviser to CM sawi:
# Thlai thar hralh (market handholding) hnuaiah kuthnathawktu chhungkaw 36821 chuang an inziaklut tawh a, eizawnna bul tan tur thalaite hnuaiah thalai 2396-in project an thehlut tawh.
* Aizawl district atangin inziaklut an thahnem ber a, mi 555 inziaklut tawhin, a dawttu Lawngtlai district atangin 338-in project an thehlut tawh.
* Diltu ngah ber department chu Commerce & Industry niin dilna 907 a lut tawh a, a dawt chu Animal Husbandry & Veterinary niin dilna 821 a lut tawh.
* A dilna system-a dilna thehlutten Whatsapp kaltlangin confirmation an dawng zel dawn a. System-ah mahni project mil trade thlan tur a awm mai loh chuan tan ‘other’ tih dah telah thlan tur a ni.
* Dilna thehlut tawh pending a la awmte chu department-in a tahtawlin an lo en zel dawn a, a khat tawka website tlawh fo tur a ni.
* CM Special Package pawh website-ah download a print chhuah mai theihin dah a ni a, fill up zawh hnu ah CM Office-a thehluh tur a ni.