Chief minister Lalduhoma hriatpuiin Bana Kaih Scheme hnuaia progress partner-te loan pekna atan Mizoram sawrkar leh partner bank ho chuan Nilaini khan inremna (MoA) an ziak. Partner bank hi State Bank of India (SBI), Mizoram Rural Bank (MRB) Ieh Mizoram Co-operative Apex Bank Ltd. (MCAB) an ni a. SBI aiawhin Regional Business Office Aizawl regional manager Hubert SZ Khobung chuan a ziak a; Local Head Office Guwahati deputy general manager Neeraj Kapoor chu hriatpuitu a ni.
MRB aiawhin chairman Sheryl L Vanchhong chuan a ziak a; Loans & NPA chief manager Naveen Thapa chu hriatpuitu a ni.
MCAB aiawhin chief executive officer A Lallungmuana chuan a ziak a, assistant general manager H Lalramdina hriatpuitu a ni.
Mizoram sawrkar aiawhin Planning & Programme Implementation secretary Lalmalsawma Pachuau chuan a ziak a, -cum- Planning additional secretary cum principal adviser Dr Lalrinchhana chu hriatpuitu a ni.
Chief minister chuan Bana Kaih Scheme hi a takin an kalpui dawn ta a. Bank nena thawh dun ngai a nih angin an thawhpui tur bank-te nen inremna an ziak thei chu an hlim hle tih sawiin, “Mizoram tan ni chhinchhiahtlak, hmasawnna kawng dik min zawhtirtu hmalakna a nih ngei kan beisei,” a ti.
MoA ziah zawhah chief minister hian Chief Minister’s Bana Kaih Innovation Challenge a hawng nghal a. Intihsiakna hi chi li ah a awm dawn a, a titha zual thlang chhuakin lawmman siamsak an ni ang. Intihsiak kalpui dan tur hi Planning & Programme Implementation department-in a la tichhuak dawn a ni.
Chief Minister’s Bana Kaih Innovation Challenge-a tel theih dan:
Department Innovation Challenge – Sawrkar department hrang hrangten project pakhat theuh theh chhuakin an intihsiak ang.
8 District Innovation Challenge – District tinin DC kaihhruaiin NGOs, LC/VC, self help group, primary agricultural credit societies leh society anga in-register zawng zawng an tel thei ang.
8 Higher Educational Institutes’ Local Immersion Challenge – Mizoram sawkar hnuaia college, sawrkar laipui hnuaia college leh private college an tel thei a. Khaw hrang hrangah zirlaite kalin an riak anga, an khaw kalnaten harsatna an tawh zirchiangin, chhawk zangkhai theih dan an ngaihtuahsak ang.
8 Inventor’s Challenge – Ngaihtuahna thar seng a, thil tha leh tangkai duang chhuak turte tana buatsaih a ni. Thil thar /tih dan thar (innovation) a ni tur a ni a, Mizoram tana danglamna thlen duh tan a tel theih vek a ni.
Bana Kaih Scheme kalpui turin bank thawhpui nen inremna ziak
