Bana Kaihte ran vulhah
insurance tih sak dawn
Bana Kaih Scheme hnuaia ran vulh thlangtute hman tur ‘livestock insurance’ kalpui dan ngaihtuahin Nilaini khan Mizoram State Policy Coordination Committee an thukhawm a. AH & Vety minister C Lalsawivunga’n a telpui.
Mizoramah ran, a bikin vawk vulhtuten African Swine Fever leng vangin harsatna an tawk nasa a. He hrileng laka ran an him theihnan AH&Vety department chuan theihtawpin hma an la tih sawi a ni. Mizoram sawrkar flagship programme – Bana Kaih Scheme kaltlangin vawk vulha bul tan tum, dilna 2518 a awm a, zirchian hnu ah hma lakpui tlaka ngaiha thlanten thlamuang taka ran an vulh theihnan insurance tha neih a pawimawh tih sawi a ni.
Thutkhawma tel insurance company-te chuan ‘livestock insurance’ an kalpui thin tawh dan leh Mizorama tha taka vawk insuarance kalpui a nih theihnan ruahmanna an neih an sawi a. National Insuarance Co. Ltd. chuan kum 2024- 2025 chhung khan bawng 110000 leh vawk 62000 vel insurance an tih sak tawh.
Insurance company-te hian livestock insurance tha taka kalpui a nih theihnan ran chhinchhiahna ‘ear tag’ neih a tul thu, vaccine pek ngei a ni tih nemnghehna leh thuneitute atangin ‘animal death certificate’ thehluh tel a tul thu an sawi.
MSPCC hoa insurance company thutkhawm hnu hian implementing department-a nodal officer leh partner bank-te nen Bana Kaih Scheme hnuaia dilna thenkhat ennawn ngai ennawn a ni.
Thutkhawmah hian MSPCC member-te, AH & Vety hotute, SBI General Insurance Co. Ltd, National Insurance Co. Ltd, United India Insurance Co. Ltd, New India Assurance Co. Ltd, IFFCO- TOKIO General Insurance Co. Ltd, Agriculture Insurance Company of India Ltd. leh partner bank aiawhte an tel a ni.
Bana Kaihte ran vulhah insurance tih sak dawn
