West Bengal chief minister hlui, Mamata Banerjee-i car chu Pathian khan North 24 Parganas district-ah mi tu tih hriat lohten an bei nia sawi a ni.
Banerjee-i chuan a car hi leirawhchan leh lung hmanga vawm niin a sawi a, ‘thah an tum’ ni maia a ngaih thu a sawi a. State BJP chuan chief minister hlui beihna hi a dem thu leh tharum thawhnaah hian inhnamhnawihna an nei lo tih a sawi.
Banerjee-i hi tun hnaia police-in an man laia an party worker thi nia sawi chenna pan tura Halisahar pana kal a ni a. A kal kawngah hian Trinamool chief car hi miin an lo hual a, chirh an lo tar a, pheikhawk leh tui umin an lo vawm a. ‘Chor bhagao’ tiin an khum a, police-in heng mite hi an hnawt kiang.
A hnuah Banerjee-i chuan leirawhchan leh lungin an vawm niin thuthar lakhawmtute a hrilh a. “Police awm laiin ka car chu an lo vawm a. Ka tukverh kha lo khar ila chuan ka lu-ah phel phawkin min fuh thei dawn a, ka thi hial dawn a. Khatianga beihna kha ka la tawng ngai lo va, police khan min veng turin engmah an ti lo va, BJP chauh an veng a ni,” a ti.
Amah zuitu, Lok Sabha MP Kalyan Banerjee leh Rajya Sabha MP Dola Sen te chuan beihna hi an tawng ve lo hlauh niin an sawi.
“(Chief Minister) Suvendu Adhikari-a hian police hi tihlan atan chauh a hmang a ni,” tiin Lok Sabha MP chuan a sawi.
State BJP chief Samik Bhattacharya-a chuan an party worker-ten tharum an thawh ngai loh thu leh an duh loh thu a sawi a, chief minister hlui beihna pawh a dem thu a sawi a. An party chu he thil thlengah hian an inhnamhnawih lo va, police-in a titute lakah hma an lak ngei a tul thu a sawi.
Tun tuma Banerjee-i’n beih a tawh hma, inthlana a chak loh hnu lawkah khan a vahpa, Trinamool MP Abhishek Banerjee-a pawh a bialah tharuma beih a lo ni tawh bawk.
Banerjee-i hi Pathianni tuk khan North 24 Parganas district-ah hian Trinamool councillor hlui pasal, tun hnaia police-in an kal laia thi ta nia sawi, Birju Keot-a ina kal tum a ni.
Keot-a hi mi pawisa laksaka puhin man a ni a, Zirtawpni khan police kuta ni nga awm turin court-in a ti a. Kanchrapara councillor hlui, Jenny Sharma-i chuan a pasal hi lock-up-ah police-in nasa taka sawisain an tihlum niin a puh a ni.
Abhishek Banerjee-a chuan police hian an bitum sa a, FIR-ah a hming pawh lang miah si lovin Keot-a hi an man lui niin a sawi.
“State chhungah FIR-a hming lang ve miah lote police-in an mana dama a lo chhuak tawh lo a nih chuan danleh thupek kenkawh dinhmun chu inzawh ngai lova thil chiang a ni a. Mahni duh dan dana thil kalpuina a ni tawh a ni mai,” tiin Trinamool hruaitu hian a sawi.
Police chuan an kuta awm laia mi an man thi chungchangah hian engmah sawi an la nei rih lo.
Banerjee-i car bei, thah an tum niin chhal
