Bangalore-a awm tum, lehkha zir tur leh hna thawk tur ten an hriat hmasak atana pawimawh leh tul Bangalore Mizo Association chuan a tichhuak.
Bangalore Mizo Association (BMA) thuchhuak chuan, Bangalore-a lehkha zir tum leh hnathawh tumte tan thu belhchian dawl lo leh inbumna lakah fimkhur a tul hle tih a sawi a. College/ institution leh hnathawhna hmun turah mahni emaw chhungte emaw a hmun ngeia kala finfiah/ hriatchian hmasak a tha, an ti a. Mizorama chanchinbu leh cable TV hmanga admission hmuh leh hnaruak zawm theih an rawn chhuah thin chu finfiah hmasak zel phawt turin an chah.
Admission buaipuina atan emaw hna hmuhna atan emaw agent-te kutah emaw mahni hmelhriatte kutah emaw sum pe hmasa lo turin an ti a. Admission leh hna chungchangah Mizo ngei an dawr a nih pawhin a hnua buaina a awm lohnan BMA hruaitute hriatpui ngei a tha hle tih an sawi.
Documents pawimawh, original keng tel ngei tura chahin, hna an zawm dawnin agreement letter felfai tak nena zawm turin an chah bawk.
‘Hnamdang kara awm tur kan nih hrerengin, Mizo takin dik leh fel taka thil tih thin tur a ni a. Bangalore-a awm turte bakah a awm mek ten buaina leh harsatna kan tawh a, awlsam zawka kan intanpui zel theih nan, BMA member nih a tha a, nih ngei kan tum dawn nia,’ BMA chuan a ti.
Chanchin hrechiang duhte tan – BMA president Laldingliana Tlau Vantawl (9972-228-955), BMA vice president Rev Dr Lalfakawma Ralte (9402-477-194), BMA secretary R Laldintluanga (8861-313-764), BMA Academic and Human Resource Committee convener HR Lalramnghaki (8257-009-002) leh BMA Academic and Human Resource Committee secretary Vanlalvuana (9366-062-204) ah te zawhfiaha biakpawh theih an ni tih BMA hian an sawi bawk.
Bangalore-a lehkha zir tur leh hna thawk turte hriat tur hrilh
