Daily Newspaper

Bank hmanga inbumnaah officer-te sum nuai 20 chuang laksak

10

Aizawl, December 11 : Bank hming hmatheha mi bumkual thinte chuan tunhnai khan Mizorama sawrkara officer thenkhat bumin an bank account atangin sum an lakchhuahsak a, hriat theih chinah cheng nuai 20 chu a chuang ngei dawn nia sawi a ni.

Mi bumtu hian tunhnai khan sawrkar officer thenkhatte chu phone-a bia in, an account neihnaa bank manager a nih thu a sawi a. Bank KYC (Know Your Customer) emaw bank account ah emaw update ngai a awm thu leh, chumi zan zanlai chu dateline a nih tawh avangin hmanhmawh thlak taka tihfel ngai a nih dan te an hrilh a, Yono password leh ID te an dil ta thin tih, The Aizawl Post-in Mizoram Police Cyber Crime hotute a zawhfiahnaah an sawi.

An chhuanlam thenkhatah chuan an date of birth inziak chu a dik loh avangin thil inmil thei lo a awm a, hei hi thlak ngai, tih te an a ni.

Sawrkar department-in webiste an neihte atangin heng officer hote hming leh an contact number hi lain hetiang hian an phone kual a, anmahni lo ringhlel deuh an awm pawhin an thawhpui pa/nu midang hming sawiin, chu pawh chu an tihfel sak tawh thu te an sawi lehzel a, awihawm taka an sawi thiam avang leh an thawhpuite emaw thawhpui hlui (pension-a chhuak tawh) te hming leh an profile nen lam chiang taka an sawi theih zel avangin a tira ringhlel deuh tu pawhin an thil duh hi an lo hrilh ta mai nia sawi a ni. An date of birth ang chite hi khawi atanga an neih nge tih erawh hriat a la ni chiah lo tih an sawi.

He case-ah hian sawrkar department pathuma officer-te leh pension tawhte an tel a. |henkhat erawh chu lo hnial fithla thak te pawh an awm a, an account a thih tur thua an hrilh (vau) zui chung pawha an thil duh hrilh duh lo tluan te pawh an awm tho bawk tih sawi a ni.

Heng officer-te bank account-a sum hi an lak fai sak vek a, a vai chuan cheng nuai 20 a chuang nia hriat a ni.

Heti ang inbumnaah hian a bumtute hian an pawisa laksak an transfer na, anmahni account nia langte hi mi account an leichhawn sak te a ni a, account dang dangah an sawn kual thin avangin chhui fuh mai a har tawh thin hle tih police-te hian an sawi.

Phone leh internet hmanga inbumna Covid lockdown hnu khan a hluar zual emaw tih tur a ni tih police-te hian an sawi a. An hriat theih chinah heng mite hi India ram chhunga cheng an ni a, ram dang atanga rawn ti chu an awm vak lo niin an sawi. Mizo zingah chuan an la awm chiah lo nia hriat a ni a, an inhnamhnawih ve te pawh, pawisa hlawha mi bank account leikhawm sak tura an tihte ang chi vel chauh a ni rih tih an sawi.

Heng mite hian bum tur hi an zawng kual nasa a, an bum tumte chanchina hriat tur tul an hre hmasa nual phawt thin. Facebook leh hetiang lam hi kaltlanga bum an tumte chu thian emaw ngaihzawng emawa kawmin pawisa emaw thildang emaw thawn angin an insawi a, airport (a tlangpuiin Delhi airport) ah chhiah pek tur pek loh vanga an lo dan tak, chumia chawi ngai chu lo chawi rih mai tura ngenna ang chi a tam tih an sawi. Hetianga an bumte hi nutlingte an awm laiin tleirawlte pawh an awm tho tih an sawi a ni.

Online hmanga bungrua lei kawngah inbumna a awm a, google search atanga miin thil a zawnna lam thlengin hetianga mi bum chingte hian thang an kam niin police-te hian an sawi bawk.

“i-phone lei tur nei anga insawiin an zuar a, tlem pek lawk ngai emaw angtea sawiin an bum thin. Hetiang case hi kan nei nual,” an ti.

Online hmanga thil lei thin pakhat chuan a thil chah ang ni lo a thleng a, a thil chahna customer care chu google search engine atanga zawngin, chutah chuan report a zuk pe a, hei hi customer care lem a lo nih avangin pawisa an laksak a, an bum ta nia sawi a ni. Pakhat leh chu, bank kaltlangin loan lak a duh a, ‘google’ atang hian zawngin a mi dawrte chuan tha takin an lo dawngsawng a, pek lawk ngai awm anga an sawite chu a pe zel a, loan lak a tum aia tam pawisa an laksak nia sawi a ni bawk.

Inbumna dangah chuan, bank account number, debit card number, card hnung lama CVV number, internet banking emaw bank mobile application user ID leh password te an dil bakah mobile app hrang hrang install a ngaih thu sawiin, heng hmang hian bank account a pawisa laksak thin a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy