Daily Newspaper

Bank loan lak theihna hmang tangkai turin MP-in ngen

15

Hrileng vanga ram leh mimal sumpai dinhmun chhe tur chawikanna atana sawrkar laipui ruahmanna, bank loan hmanga intunnun theihna chu mipuiten chhawr tangkai turin Rajya Sabha MP K Vanlalvena chuan a sawm a. Bank-te pawh he scheme hnuaiah hian inhawng turin a ngen tih a sawi.

Covid-19 leng vanga India ram economy dinhmun tlahniam mek chuan harsatna lian zawk a thlen lohna turte, India ram hmalam hunah retheihna avanga buaina chi hrang hrang thleng theite pumpelh a nih theih nan Prime minister Narendra Modi chuan Covid-19 doletna policy thar, India ram intodelhna tura beihpui thlakna – ‘Atma Nirbhar Bharat Abhiyan’ a puang tih a sawi.

‘Self-Reliant India Mission Policy’ tihhlawhtlinna atan hian sawrkar laipui chuan cheng vaibelchhe nuai 20 a dah a, sum ruahman zaa 75 vel hi bank kaltlanga loan hmanga pek tur niin, zaa 25 chu grant system hmanga pek tur a ni. State sawrkar sumbawma khung tur a nih loh avangin state sawrkar-ten mawh an phur lutuk thei loa, mipui leh Bank hrang hrang thawhhona tha atanga tihhlawhtlin tur a ni tih MP (RS) hian a sawi.

“Sawrkar laipuiin Covid-19 dona atana a sum ruahman atanga cheng tluklehdingawn 2000 atang hian tluklehdingawn 1995 hi Mizoram tana kan thal ve theih huangchhung ami niin a lang a. Sawrkar laipui duhdan angin Mizorama bank awm zawng zawngte hian mipuite khaichhuahna turin a tam thei ang bera loan pe tura kan inbuatsaih thuai thuai hi kan tihmakmawh a ni a. Mipui pawhin bank nena indawra ruahmanna tha siam tura kan inbuatsaih a hun hle a ni,” K Vanlalvena hian a ti.
Hemi kawngah hian bank-ten loan la duhte chu, an rul thei dawn em, tih aiin, a mamawh em, tih chu a en hmasak tur zawk a ni, tih chu he policy-in a tum ber a ni tih sawiin, “Tun dinhmunah State Bank of India chu he ruahmanna kalpui tur hian a inpeih viau tawh a, bank dang pawhin hma lak an tum tan a ni,” a ti. Bank-te nen hemi chungchang sawia an thutkhawm tawhnaah chuan bank lam hi an inhawng em em nia sawiin, “An inhawng lo thiang lo zawk a, Reserve Bank of India pawhin hriattirna khauh tak a siam tawh a ni,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy