Barca hmahruaina fan leh hret!
Lewandowski, Yamal leh Bernal-te goal khat theuh thawhkhawm hmanga si thum faia an mikhual Mallorca hnehin Barcelona chuan Spanish La Liga table-a an hmahruaina a n pawtsei hlek a, pahnihna Real Madrid lakah point lia sangin, nizan result tarlan hman loh inkhel pakhatah Bernabeu club-in Valencia khelmuala hnehna an chan ve leh chuan Catalan-ho nena an inkar hi point khat bawkah an dahkir leh ang.
Team talbuai Mallorca hian mipui 44,301 fuankhawmna Spotify Camp Nou-ah darkar chanve chhung an lama goal lut tur an hum teuh thei hle nain minute 29-ah Robert Lewandowski chuan Dani Olmo siamsak atangin mikhual hmahruaina goal a thawh a, hei bak goal dang erawh chawlhlawk hmain mualneitu team hian an khung belh zo bik lo.
First half chhung khan Mallorca hmatawng Jan Virgili chuan Barcelona defender Jules Kounde a chhaihbuai fu a, vawi duai lo inmalbeihah mikhual player hian Barca tlarhnung hi a paltlang a, mahse, Mallorca lamin goal em chu an khung zo bik lo.
Darkar chanve khelh tlin dawnah home team lam an chefuh ta zawk a, a ke dinglam hmanga Marcus Rashford-a ball thawnluh chu dansak mah se ball leu kual chu Olmo khawih phakah awmin, ani hian Lewandowski tan a chhawpsak a, Pole chesual duh lo hian Barca hmahruaina goal a khung er zawk.
Chak harsat Jagoba Arrasate team hi second half lamah pawh an changkang zo tak tak lo a, minute 61-ah Lamine Yamal-a goal an chhuah leh.
Spanish rawlthar kum 18 mi goal tur hi Olmo chhawpsak leh bawk niin, Mallorca a hmahhawn vawi rukah Spain international hian goal thum a thun tling ta a ni.
Minute sarih chauh awm tawhah Nou Camp luahtute hian an mikhual hliamah chi an phul belh leh salh a, Fermin Lopez thawhrah atangin kum 18 mi ve bawk substitute Marc Bernal chuan Barcelona tana a goal hmasaber leh si thum faia mualneitu team chakna goal ni zui ta a thun a; an mawngphe hmu hman thuak thuak tawh Bernabeu club lakah Hansi Flick-a team hi an tawlh hla leh hlek.
European Super League project an tih atanga inhnukdawk hlim Barcelona hi tun season La Liga bika an home game 11-ah an la chak fai vek a, heti zat Nou Camp match-a goal an chhuah loh vawi rukna chiah a ni bawk.
Catalan team hian February ni 16, Thawhtanniah La Liga game an khel leh chauh dawn a, tah chuan Girona an luhkhung ang a; chu mi hma tunkar Ningani zan hian Copa del Rey semi-final first leg match-ah Atletico Madrid an hmachhawn ang.
Relegation zone-a la tla lut lo hram hram Mallorca, ve thungin an match khelh leh tur February ni 15 khian Real Betis an tum leh dawn a ni.
Barca hmahruaina fan leh hret!
