Daily Newspaper

Barca in Martinez an hnaih

7

Manager thar hnuaia team insingsa mek FC Barcelona chuan Inter Milan atangin Argentine striker Lautaro Martinez lak an tum zui zel a, an indawr fel thei tep tawh niin tarlan a ni.

2019-20 season tawp hma atang tawh khan Calatan club Barca hian Martinez hi an lo hmutai tawh a, an tlarhma thuamchak turin an duh hle. Lak tumin an hel fo tawh a, manager thar hnuaia team an insingsa a, Messi, Suarez leh Vidal te an chhuak ngei dawna a lan tak vangin Barca hian Martinez hi an mamawhna a sang leh zual. Barca hian Martinez hi lak a, a manah Inter Milan in lak an duh Vidal kal teltir an tum thung.

Season liam taah Inter Milan tan inelna hrang hrangah vawi 49 khel a, goal 21 thuntu Martinez hian kum 2018 khan Racing Club atangin Inter hi a zawm a, Inter hian a manah £20m an seng. Inter Milan tan hian Serie A-ah bik vawi 60 a inlan tawh a, goal 20 a thun tling tawh. Club leh ram tan a khel tha chho a, Premier League club te pawhin an hmutai hle. Europa League final-ah Sevilla laka vanduai Inter hian kum 23 mi Martinez lakchhuah theihna zat atan hian £100million zet an dah. Barca hian sum hlawm bakah midfielder tha tak, Serie A-ah pawh tawnhriat nei tha Arturo Vidal pek tel an phal a, hei hian an indawr a tiawlsam sawt tura ngaih a ni.

Vidal hi a club hlui Juventus pawhin lak an duh a, ngaihventu a la nei hraw hle. Martinez leina sum engemawzat dawn bakah Vidal neih tel hi Inter Milan tan thil thlakhlelhawm tak niin a ngaih theih. Inter manager Antonio Conte pawhin Vidal hi a hmutai hle a, Christian Eriksen chhuahtir a, Vidal lak luh a duh. Tottenham atangin Eriksen hi thla riat kal ta mai khan an la lut a. An beisei anga an chhawr tangkai tawk loh vangin chhuahtir an pawiti lo niin tarlan a ni. Eriksen ai hian Vidal hi an dah sang zawk a, Eriksen hralhchhuah a, Vidal lak luh dan kawng an dap.

Midfielder tha leh hriat hlawh tak Vidal hian season liam ta khan Barcelona tan vawi 43 a khel a, goal riat a thunsak. Vidal hian 2018 khan Bayern Munich atangin Barca hi a zawm a, La Liga-ah vawi 66 inlan in, goal 11 a thun tawh. Bayern a pan hma hian Serie A club lian Juventus tan hlawhtling takin a lo khel tawh thin a, Serie A-ah vawi 124 zet khel in, goal 35 lai a lo thunsak tawh. Club lian hrang hrangah tawnhriat tha tak a nei tawh a, an ram Chile tan pawh vawi 115 zet khel tling tawh in, goal 28 a thun tling tawh a, Copa America-ah vawihnih a champion pui bawk.

Barcelona manager thar Ronald Koeman chuan a player duh zawng sengkhawmin, a squad a thuamchak mek a. Liverpool atangin Georginio Wijnaldum a la lut fel tep tawh a. Midfielder tha tak Wijnaldum a lak luh dawn vang hian Vidal a mamawh tawh lo niin a ngaih theih a, Vidal tan Inter Milan pan theihna hun remchang tak a inhawng ve thung. Barca tang hian Luis Suarez pawh a chhuak ngei dawn a, Juventus in lak tumin an hel mek a, Serie A champion hian Cristiano Ronaldo nen inkawp turin Suarez hi lak luh ngei an tum.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy