Daily Newspaper

Barca-in Suarez kaltir remti

35

Barcelona chuan an striker duh tawh loh Luis Suarez chu an tana a hnawksak zui theihna Atletico Madrid lama kaltir an remti a, Uruguayan pawh hian a club tharah hlawh tlem zawk lak a remti ve tawh bawk.

Tarlan tawh thin angin, Barca manager thar Ronald Koeman-a hmalam ruahmannaah Suarez hi a tel pha lo a, chhuahna zawng turin an hriattir a, a chhuak thei dawn a nih phawt chuan an captain Lionel Messi ang lo takin chhuah an phalsak a, a hmain Juventus zawm a tumna chu ‘passport’ lama harsatna avangin a lo tlawlh tawh a ni.

La Liga lama kaltir tumna hi Barcelona chairman Josep Maria Bartomeu chuan a dang zet a, Spanish club veka kaltir chu an tana hnawk thei tura a ngaih avangin a duh lo a, mahse, Suarez-a aiawhte nena an inbiak hnuah Catalan club hi an inhnukdawk leh ta a, a chhan pawh media hmaa Suarez hian a lungawi loh thu tarchhuaha a vau vang niin an sawi.

Catalan club hian an striker duh tawh loh hi sumtuakna atan an hmang dawn lo a, a man pawh hi a hming chauh an hui dawn a, euro maktaduai li aia toin Atletico hnenah hian an hralhchhuak dawn lo a, a man hi Champions League a khelhpui phak leh phak loh azirin a la danglam thei dawn a ni.

Kum 33 mi Suarez hian Barcelona lama kumkhata euro maktaduai 30 a hlawh thin zatve kha Atletico-ah a hlawh tawh dawn a, a nupui pawhin a bazar dan a thlak hlek a ngai dawn a nih hmel!

Nou Camp-a kumruk a khawsak chhung khan Suarez hian game 283-ah goal 198 a thun tling a, Lionel Messi leh Neymar nena Barca tlarhma an luahho lai kha Barcelona attacking hmuhnawm leh hlauhawm zual lai zinga chhiartel a ni.

Kum 2014 khan Barcelona chuan Suarez hi Liverpool atangin pound maktaduai 74-in an leichhuak a, La Liga title pali, Copa del Rey pali leh Champions League title pakhat bakah kum 2015 khan Club World Cup-ah a champion-pui bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy