Season tawp ruala Barcelona manager a nihna chawlhsan a tum thu lo puang uk tawh Xavi Hernandez chuan Nilainthu dang nei lehin, 2024-25 season-ah pawh LaLiga giants a enkawl chhunzawm leh dawn tih club thupuangtu chuan a sawi.
Reuters tarlan danin, club lam chuan Xavi hi a coaching staff an siksawisak chiam dawn lo a, chu mai ni loin sum lamah harsatna lian tak tawk mek mah se club president Joan Laporta chuan kumin nipui insuan hunah hian top-level player engemawzat sengluhna tur sum a pe dawn!
Nilaini khan Xavi leh Barca official-te chu pindan chhungrilah an meeting a, a contract neih laia a kum tawpna ber tur hman zawh loh a lo tum zet tawh chu an \hulhtir thei a, club lam nen pawh a chunga tarlan tak ang hian inremna hraw tak an siam zui ta a ni.
Inkawmna an zawh hnu lawkah club vice-president Rafa Yuste chuan Barcelona khuaa Laporta chenna in kawta chanchin ngaichang reporter rual pungkhawm hmaah thu sawiin, “Xavi hian min hruai chhunzawm leh dawn a, kan phur hle a ni. A hna chhunzawm leh tur hian club board lam nen pawh inbiakremna fel tak siam a ni,” tiin.
Tarlan fo tawh angin, kum 44 mi hian kumin January thla mai khan tun nipui thawt ruala Barca boss nihna bansan a tum thu a puang a, mahse, president Joan Laporta berin la cham rih atan a duh miau a, kum 2025 thleng an la inkawl chhunzawm leh rih dawn a ni.
Spain midfielder hlui hian Qatari club Al Sadd a chhuahsan hnuah November 2021 khan a club hlui head coach ni turin Nou Camp office a luah \an a; a full season hmasaberah Spanish title a lakpui nghal.
Season kal laiah game ruk chauh a awm tawh laiin an hmelma lian ber leh hmahruaitu ni mek Real Madrid chu point 11 ngawtin an pha tawh lo a; karliamta mai khanChampions League quarter-final a\angin la champion ve thei lo Paris St-Germain chuan an petchhuak bawk.
Barcelona player a nih laia trophy 25 zet lakpuitu Xavi hian a team enkawl lai chu tun season La Liga El Clasico vawihnihah a tlawmpui tawh bawk a, nipui lai hian chhuak pawh ni se a awm tho mai thei!
Chutih laiin Catalan team chu season tawp lamah a chet\hatpui phian a, Pathiannia Real Madrid khelmuala 3-2-a an tlawm hma league match hnuhnung 10-ah tlawm a pumpelhpui vek a, inkhel lian berah an han tawlhtlu leh mai chauh ani ve bawk!
Barca thuam a inbel chhung kum 1998 leh 2015 inkar khan Xavi hian match 767-ah goal 85 a khung tling a; kum 17 chhung khan trophy 25 a lakpui zingah Champions League title pali leh La Liga lallukhum pariat a tel.
Barcelona-ah Xavi nghet deuh deuh!
