La Liga champion FC Barcelona chuan Pathianni zan khan Valencia an mikhual a, an mikhualte hi 6-0 ngawtin an lo sawp. Barca hian hmahruaitu Real Madrid nen an inkar an tizim.
Champion lai Barcelona hian Estadi Johan Cruyff-a an mikhual Valencia ngam viau mah se goal an thun thei lawk bik lo. Ball chang tam zawk an nih reng hnuin Fermín López chuan minute 29-naah hmahruaina goal a thun. Hmahruaina goal an thun vangin phur viau mah se chawlhlawk hmain goal dang an thun belh thei lova, 1-0 a hmahruai chungin chawlhlawk an hmang.
Chawlhlawk hnu lamah Barcelona an khel tha ta viau a, a khat mawi tawkin goal an thun a ni ta ber mai. Minute 53-na lekah Raphinha chuan an goal hnihna a thun. Raphinha goal thun atanga minute thum hnu lekah goal hmahruai thuntu Fermin Lopez chuan an goal thumna thunin an hmahruaina a ti zau. Hemi hnu lawk hian Raphinha chuan minute 66-naah an goal lina a thun zui leh zat bawk.
Si li fai ngawta hma an hruai hnuin Barca tan Robert Lewandowski a inlar a, goal hnih a thun belh. Lewandoski hian minute 76-naah an goal ngana a thun hnuin minute 86-naah an goal rukna a thun a, a tawp a khar. Lewandoski goal thun hnuin goal dang a luh belh thei tawh lo va, Barcelona chuan an mualah 6-0 ngawta hnehna an chang a, awlsam takin point thum an hmu. Season tharah Barca hian vawi li khel tawhin vawi thum an chak a, draw vawi khat an nei a, point 10 hmuin pahnihnaah an awm. Barcelona chunga awm mek chu sason thara la chak vek Real Madrid an ni.
Club hlun leh hausa Real Madrid hian inrinni zan khan mikhual an nihna hmunah 2-1 in Real Sociedad an hneh. Sociedad laka an goal hnih hi Kylian Mbappe leh Adra Guller te thun a ni. Real Madrid hian season tharah vawi li khel tawhin an la chak vek a, point 12 hmua table chung ber luahin, an hnuai chiaha awm FC Barcelona aiin point hnihin an sang zawk mek. Real Madrid hian season liam ta khan an elpui lian Barcelona an ngam lo viau a Barca an hneh loh zel mai kha kut benga season an khar chhan a ni ber. Season tharah insiamtha a, La Liga champion ni thei tur chuan Barcelona an ngam ve deuh tawh a ngai dawn a. An hmelma lian ber hi an hneh thei lo a nih pawhin tlawm an pumpelh tal a ngai ngei ang.
Barcelona an chak nuamsa
