Municipal de Montilivi stadium-ah Pathianni zan khan Barcelona an chak leh a, 4-1 tehrenga mualneitu Girona sawpin, tun season-a match nga an khelh tawhah hnehna chang vekin point 15 nen La Liga table-a an hmahruaina an sawhnghet.
He inkhelah hian 2024 Euro-a Spain champion-puitu rawlthar kum 17 mi Lamine Yamal chuan goal hnih khungin, Spain winger goal hmasa zawk hi minute 30-a David Lopez ball chhuah hmanga Girona goalkeeper Paulo Gazzaniga pela goal hmahruai a tihluh a ni.
Minute sarih a liam a, Yamal bawk hian a goal hnihna tilut zui lehin, Raphinha free-kick letleh atanga a thun a ni.
Season liamtaa pathumna lai luah pha Girona hian penalty an beisei a, mahse, Bryan Gil-a ball tauhin Inigo Martinez ban fuh ngeia an ngaih kha video assistant referee-in a endik hnuah penalty-a pawm a ni lo.
Second half tir lamah Dani Olmo chuan Barca goal thumna thawhin, kum 2011-a chanchin nei laih Cesc Fabregas hnu lamah Olmo hi Barcelona tan league match hmasa pathuma goal khung kim vek thei hmasa ber a ni.
Midfielder Pedri chuan minute 64-ah mikhual goal lina khungin, substitute Cristhian Stuani chuan hun tawp hma minute 10 la awmah mualneitu Girona goal neihchhun khungin, minute ruk hnuah khelmual chhunga minute 17 chauh la tal hman Manchester City winger hlui Ferran Torres chu Yaser Asprilla laka a foul avangin hnawhchhuah a ni a, mahse, a tam zawk an nihna hi Girona-in an hmangtangkai zo ta chuang lo.
Hansi Flick-a team Barcelona hi point liin pahnihna leh pathumna Atletico Madrid leh Real Madrid lakah an sang.
Pathianni zan inkhel dangah Atletico Madrid pawhin sithum faiin an mikhual Valencia an sawp a, table-ah Barca hnungdawlin pahnihna an luah.
Goal hmahruai hi first half-a England midfielder Conor Gallagher tihluh niin, kum 24 mi Gallagher hi thla hmasa mai khan Chelsea atangin pound maktaduai 33-in an lei a, Atletico tana a goal khatna a thun zui ta a ni.
Civitas Metropolitano stadium-a mipui 61,752 zet pungkhawm hmaah Antoine Griezmann chuan half-time zawhah Atletico goal hnihna khungin, mualneitu team goal thumna hi Julian Alvarez thawh a ni a, kumin nipui thawt laia Manchester City a chhuahsan hnua a club thar tana a goal hmasaber ve bawk a ni.
Argentina striker Alvarez hian Madrid club tana a game hmasa paliah goal a khung zo lo a, a chetfuh ni a herchhuak ve ta nge nge a ni.
He result avang hian Atletico chuan La Liga table-ah pahnihna an luah chho a, an hnuai chiaha pathumna luahtu Real Madrid nen point 11 ve ve neiin, hmahruaitu Barcelona lakah point liin an hniam.
Barcelona an chesual duh lo
