Bench thawhsana Barcelona tana game 100 a khelh tlinna Inrinni zan inkhelah Pedri chuan second half-ah sikhat faia mualneitu Girona an hnehna goal awmchhun khungin, Catalan team hian point 47 nen La Liga table-a an hmahruaina an sawhnghet sauh a, nizan result tarlan hman loha pathumna luahtu Real Sociedad hma-chhawn Real Madrid lakah he thu buatsaih lai thleng hian point rukin an sang tawh.
Kum 20 mi Pedri chuan Girona tlarhnung phelh pheng phung karah minute 61 an khelh tlin rualin Jordi Alba cross a chhawrtangkai a, Catalan team chakna goal awmchhun khungin, point 21 nen Girona hian table-ah 12-na an thut.
Hremna avanga an forward hriam pahnih Robert Lewan-dowski leh Ferran Torres chhawr thei lo coach Xavi Hernandez chuan tihrawl hliam atanga damchianna kawng zawh chho mek midfielder Pedri a awl tluan zo lo a; Montilivi khel-mualah team siksawi lehin, a player pawimawh pahnih – Andreas Christensen leh Ale-jandro Balde a chawlhhahdamtir a, chutih laiin Manchester City defender hlui Eric Garcia chuan thla thum chuang chhunga a vawikhatna atan luhhmasak a chang ve bauh.
Tihrawl hliam France winger Ousmane Dembele lakchhuah a nih hnu minute 25-na lekah a beisei aia hmain Pedri chuan khelmual a lut a; ball 70% zet an chang chungin Barcelona-in first half chhungin goal an tilut zo lo a, Girona tlarhnung an chesual duh mai bik lo.
Minute 40 an khelh tlin hma zawngin Barca khan goal zawnah takngial pawh ball an thawnlut zo lo a, mahse, Pedri pet chu Gi-rona goalkeeper Paulo Gazza-niga tan dan harsa a ni lo.
Tarlan tak angin, second half-ah mualneitu team tlarhnung a pherh zui ta tlat a, Barca mid-fielder Pedri chuan goal awm-chhun thunin, mikhual team khan hun pumin goal zawnah vawi-thum chiah ball an thawnlut zo a, clear chance han tih ang chi phei chu vawikhat chiah an nei!
Xavi team kha nikum October ni 16 daih tawha Real Madrid laka 1-3-a an tlawm hnu khan Inrinni zan thlengin La Liga bikah tlawm an la nei leh ta lo tluang zel a; inelna hrang hrangah belhkhawmin game 13 chhung tlawm an pumpelh kal mek.
Hei hi an dinhmun a nih avangin 2018-19 season hnu lama a vawikhatna tur La Liga title pawh an beisei sang viau tura ngaih a ni!