Barcelona goalkeeper thar Garcia
Spain tana 2024 Paris Olympics football trophy lo hawn tawh Joan Garcia kha Barcelona chuan kum ruk chhung atan contract an ziahpui a; Espanyol hnenah contract zawh hmaa leichhuak duhte tana sum pek ngai zat euro maktaduai 25 (£21.3m) an pe fel nghal.
Kum 24-a upa Garcia hian vawiinah official takin Spanish champion hi a zawm dawn a; English club hraw pahnih Arsenal leh Manchester United aia Catalan team a thlan zawk chhan hi an rama khawsak zui zel a duh vang a ni.
Kum 2021-a Espanyol debut a nghah chhuah hnu khan he club tan hian match 67 a khel tling a; Espanyol chu kum 2023-24 khan La Liga lamah kaipuiin, season liamtaa top-flight kawtkaia an inhamtan theihna kawngah a thawhhlawk hle bawk. Spanish top division-ah hian ‘save’ ngah ber (146) a ni nghe nghe.
Spain senior team-ah la inlan lo mah se age-group team hrang hrangah erawh a mikhual lo a, tarlan tawh angin, nikum nipui thawt laia Paris khawpuia gold latu Spain Olympic team-ah khan an player pawimawh a ni.
Barcelona chuan an first-choice keeper Marc-Andre ter Stegen-a hmun chuhpui theitu tur an dapna kawngah Garvia hi an thlang ta a ni.
Ter Stegen hian nikum September thla khan hliam na tak tuarin, season liamta pumpui deuh thaw kha a inkhel thei lo a, Nou Camp club chuan an first choice thei lo hmunah kum 35 mi ni tawh chungin Arsenal goalkeeper hlui Wojciech Szczesny kha an chhawr mai a ngai.
Ani hian inelna hrang hrangah game 30 goal veng tlingin, La Liga title a lakpui a, mahse, hun reilote atan chauha rawih a nih angin tunthla tawp rual hian a contract neih lai a hmang zo tawh dawn a ni.
Barcelona goalkeeper thar Garcia
