Nilai zan khan Spanish La Liga 2026-27 khelh chhunzawm a ni a, season thara la chak vek champion lai Barcelona chuan an mikhual Racing Santander chu 7-2 ngawtin an sawp. An mualah awlsam taka an chak tum hian Barcelona captain Raphinha chuan hattrick a siam. Nilai zana inkhel dangah Atletico Madrid in an mualah 4-0 ngawtin hnehna an chang ve bawk.
Barca dang thei an awm lo
Season thara bul tan tha a, an khelh tawh china la chak vek Barcelona hian an mualah Racing Santander an mikhual. An mikhual lakah an khel tha viau a, chawlhlawk hmain goal li ngawt an thun hman. Catalan club lian Barca tan hian defender João Cancelo chuan inkhel tan atanga minute 8-na lekah hmahruaina goal a thun. Hma takah goal an thun vangin an phur a, inrintawkna sang zawk nen an mualah an inlan chhunzawm.
Hma takah goal an thun hnuin Barca in goal thun belh ngei tumin an khingpuite an nawr a, captain Raphinha chuan minute 25-naah penalty atanga goal thunin an hmahruaina a tizau. Penalty atanga goal an thun hnuin mikhual team an che fuh ve thung a, Maguette Gueye chuan minute 30-naah goal thunin an si phurh a sut then. An si phurh an sut then vangin phur thar viau mah se Racing Santander an phur rei thei lo. An player Asier Villalibre chuan minute 35-naah an lamah a ti-goal palh a, mualneitu team tan an goal thumna thunsakin, an inkar a zau nawn leh. Own goal a awm hnu lawkah Barcelona tan Raphinha chuan mnute 42-naah an goal lina a thun zui leh zat a, 4-0 ngawta hmahruai chungin chawlhlawk an hmang zui ta a ni.
Chawlhlawk hnu lamah inkhel a hmuhnawm chhunzawm a, goal li ngawt a luh belh leh. Inkhel hmuhnawm takah mikhual team an che fuh hmasa leh a, Yassir Zabiri chuan minute 65-naah goal thunin an si phurh a sut then a, mualneitu team nen an inkar an tizim nawn leh. An goal hnihna hian phurna thar pe bawk mah se an chesual zui leh thuai a, an lawm rei lo kher mai. Goal hnih thun tawh Raphinha chuan minute 67-naah penalty atangin an goal thumna a thun a, hattrick a siam. Raphinha goal thumna hian Racing Santander in Barcelona lakah point hmuh an beiseina zawng zawng a tihthlawnsak a, an dinhmun a chhe tawh hle
Raphinha-a’n hattrick a siam hnu lawkah Arsdenal atanga an lak thar Gabriel Jesus chuan minute 79-naah goal thunin an hmahruaina a tizau leh zual a. Ballon d’Or dawng ngei tura in ngai Lamine Yamal chuan minute 89-naah goal thunin an tawp a khar a, an mualah ngei 7-2 ngawtin hnehna an chang zui ta a ni.
Champion lai Barcelona hian season tharah vawi 6 khel tawhin an la chak vek a, point 18 hmuin table chung ber an luah. An hmelma lian Real Madrid chu vawi khat an tlawm tawh a, an inkarah point thum a tla zep mek a ni.
Atletico an chak awlsam
Nilai zana inkhel dangah Madrid club lian Atletico Madrid chuan an mikhual Osasuna chu 4-0 ngatin an hneh a, awlsam taka point thum hmuin hma lam an pan ve zel.
Atletico Madrid tan hian Jonathan David chuan minute 24-naah hmahruaina goal a thun. Minute 24-naah hamhruaina goal thun bawk mah se goal dang an thun belh thei mai lova, 1-0 a hmahruai chungin chawlhlawk an hmang.
Chawlhlawk hnu lamah Atletico Madrid an khel tha lehzual a, goal thum an thun belh. Mualneitu tan hian Lee Kang-In chuan minute 54-naah an goal hnihna thunin an hmahruaina a tizau a. Hemi hnu hian Robin Le Normand leh Álex Baena ten goal khat ve ve an thun belh leh bawk. Mikhual team in an si phurh an sut thei lo tluan a, an mualah awlsam takin an chak zui ta a ni.
Osasuna sawptu Atletico Madrid hian pathumna an luah thar.
Barcelona in an khingpui a sawp nek
