Thawhlehniah league game khelin Catalan team an chechhuak a, Mallorca khelmualah hnehna chang zo lo mah se tum hnih si phur hmasa chungin 2-2 draw an hlawhchhuak a, season kal laiah tlawm an la pumpelh tluang zel.
La Liga hmahruaitu Barcelona laka mualneitu team hmahruaina goal hi Antonio Sanchez siamsak atanga Vedat Muriqi tihluh niin, minute riatna leka Barca goalkeeper Marc-Andre ter Stegen tihsual hrinchhuah a ni.
Minute 41-ah Leeds United forward hlui Raphinha chuan mikhual siphurh sut bawk mah se chawlhlawk dawn hun pekbelh minute thumna a kal mek laiin Abdon Prats chuan Mallorca hmahruai nawnna goal a tilut ve leh a, half time-ah home team lamin 2-1-in hma an hruai zui ta tho a ni.
Xavi Hernandez-a team khan an siphurh pahnihna an sut mai thei lo a, mahse, beidawng loa nawrin, minute 15 a la awm tihah Raphinha siamsak atangin substitute Fermin Lopez chuan mikhual tan a thun a, Nou Camp club-in an mikhualna atangin point khat an hawn thei a, la tlawm loh programme an kalpui mek pawh an la chhunzawm thei!
Tun kha kum 20 mi Spanish midfielder Lopez tan Barca tana a competitive goal hmasaber niin, Barcelona chuan tun season thara La Liga match an khelh hmasak vawisarihah tum nga hnehna changin, draw vawihnih an nei a, karliamta mai khan Champions League lamah 5-0-in Royal Antwerp an sawp bawk.
Nizan result tarlan hman lohah La Liga table-a pahnihna luahtu Girona-in mualneitu Villarreal an hneh emaw pathumna Real Madrid-in an mi-khual Las Palmas laka hnehna an chang emaw a nih chuan champion lai Barcelona hian league-a an hmahruaina an hloh thei ang.
Barca hian point 17 nei mah se an hnuai chiaha awm Girona nen he thu buatsaih lai hian point khat chauhin an inthlau a, point hniha an aia hniam Real lakah pawh an dinhmun a him lo a ni.
Son Moix khel-mualah khan hun pekbelh minute riatna a zawh hmain Mallorca player Maffeo chu hnawhchhuah a ni a, mahse, a tam zawk an nihna kha mikhual team-in an chhawr hman ta bik chuang lo a ni.
Kartawp Zirtawpni hian Barcelona chechhuak lehin Sevilla an mikhual dawn a, karleh lamah Champions League group stage match khelin Porto an luhkhung zui leh ang.
Barcelona-in tlawm pumpelh zel
