US President Joe Biden, First Lady Jill Biden leh US sorkara mi thil tithei tak tak te telna function-ah Kennedy Center Honors chu kumin atan an sem leh a, Barry Gibb, Dionne Warwick, Queen Latifah, Renee Fleming leh Billy Crystal te chuan he chawimawina hi an dawng.
Kennedy Center Honors hi artistic achievement a US sorkarin chawimawina a pek sang ber niin, kumin hi hetiang chawimawina an pek chhuah vawi 46-na a ni tawh a, host leh 2017 honoree ni bawl Gloria Estefan bakah Michael Bublé, Dove Cameron, Ariana DeBose, Robert De Niro, Sheila E, Missy Elliott, Cynthia Erivo, Whoopi Goldberg, Gladys Knight, Jay Leno, Lin-Manuel Miranda, Rita Moreno, Ego Nwodim, Rob Reiner, Meg Ryan leh Kerry Washington te pawhin kumin chawimawina dawng te pualin stage an luahlum a ni.
Barry Gibb, kum 77 hi hlaphuah lama hmingthang niin, Bee Gees te pawh lo thawhpui tawh, Grease film title track phuahtu, Dolly Parton leh Kenny Rogers te 1983 hla hit ‘Islands in the Stream’ Bee Gees nena phuahtu ni bawk kha a ni a, ani hi rimawi khawvela hming chuai tawh lo tur Gibb unau zinga upa ber leh a la dam awm chhun a ni tawh.
Dionne Warcick, kum 82, pawh hi ‘Do You Know the Way to San Jose” leh “I’ll Never Fall in Love Again” tih hlate avanga Grammy pawh lo dawng tawh, Grammy panga leh lifetime achievement award dawng tawh a ni a, he event-ah hian Clive Davis chuan, “Dionne Warwick sak theih loh tur hla a awm lo a ni ber,” a ti hial a ni.
Queen Latifah, kum 53, hi hmeichhe rapper zingah Kennedy Center Honors dawng hmasa ber a ni a, Billy Crystal, kum 75, hi fiamthu thiam he chawimawi dawng thei mi tlemte zingah telin, ani hian 2007 khan Mark Twain Prize te pawh a lo dawng tawh a ni. Renee Fleming, kum 64, hi tunlaia sopranos zinga hriathlawh ber pawl a ni a, 2014 khan Super Bowl-ah American National Anthem sain, opera singer zingah a hmasa ber a ni.
Barry Gibb, Dionne Warwick, Queen Latifah ten 2023 Kennedy Center Honors an dawng
![](https://theaizawlpost.org/wp-content/uploads/1-237.jpg)