Daily Newspaper

BASICS IN AGRICULTURE – IV

55

-RK Dawla
Ramlaitui
Mb 9366095658

Lo neih leh ranvulh (Agriculture & Animal husbandry) hi Pathianin mihring a siam atanga Department hmasa ber a ni a, mihringte dam khawchhuahna, ei leh in tur chungchâng a nih miau avângin, a aia pawimawh hmasa a vàng hle ang. Oil leh jade ngah ram te, rangkachak leh lunghlu ngah ram te, nomads leh nuclear power nei ram pawh ni sela, ei leh in tur hrisel leh thianghlim kan mamawh vek a. Kan ram mipui tamzâwkin kan buaipui chung pawha, tihtham thawnchhuah chu sawi loh, kan ni tin ei tur pawh kan la intodelh lawi si lo hi ‘engvàng nge’ tih leh ‘engtinnge’ tih hi mi pangngai chin chuan kan mut-mawh hnar-mawh tur a ni dawn lo’m nit Covid-19 hian kan ram hi bêng harh lul teh se….

HNIM MAWLH MAI HI
Huan leh lovah hnim hi kan thil buaipui thin ber pakhat niin, tha sèn titamtu ber pawh niin a lang. Kan thlaite chawtha pêk emaw an natna enkawl tha hman lo lêkin fur chhung chu hnim buaipui reng rengin kan tlingtla a. Chem-kawm, chem-kual leh Hlo tûr chi tinrengin hnim lakah indo kan puang a. Mahsela, engvanga Pathianin kan leilungah hnim hi awmtir tlat nge a nih kan ngaihtuah hmaih fo tthin. A nihna takah chuan, hnimte awm miah lo sela chuan, kan thlaite leh keini ngei pawh hi kan awm tawh bik miah lovang. Ram lumah kan awm miau a, kan leilung danah chuan, kan leilung hi thil to engemaw berin a khuh a ngai tlat a ni!

Tropical ecosystem-ah chuan, thlai chawte hi leiah 10-20% chauh awmin, a bãk 80-90% zet chu thil tovah a awm thin. Chutia nih chuan kan huana thlai chaw tam ber chu hnimah a awm daih a nih chu. Kan huan/lo ramah hnim tote hian lei kal ral tur vêngin, nisa leh ruahsurin lei chunglâng leh microbes tangkai a sawisa tur an vêng a. Zopa tapchal ang maia huan fai kawlh vul hi cancer tlukin a pawi thei! Hnimte hian lei that dan an entir bawk a. Bit taka hnim an tova, season lehah hnim chi ngai bawk an to nawn leh a nih chuan, lei a chhia tihna a ni thin. Lei a lo that hian hnimte chu an inthlâk ve mai thin. Tin, lei thûrah hian hnim hi an bitin enkawl an har thin bawk. Chuvàngin, hnimte hi automatic-a lei intuamdamna hmasa an ni a. Lei chhia leh lei thûr an ngam a, an duah hluah thei zel hi malsawmna a ni zâwk a. An nihphung hrechiang lova, tûr hmanga kan sawisa thin hian leilung ecosystem a tichhe nasa êm êm a, tuamdam leh a harsa-in hun a duh rei êm êm tawh thin. Tichuan, kan huan leilung khuh turin englai pawhin hnim a awm reng a ngai a, leilung tuamdam turin. Hnim kan ngaimawh a nih chuan, a aiawha leilung tuamdamtu tur biomass (thil to ruang/thlai engemaw chin) a ngai e. He tropical ecosystem khuarel hi kan zawm loh chuan, NATURE do zâwngin Agri kan kalpui tihna a ni ang a, a tlo ngai lovang.

AR IN/VAWK IN RIMCHHIA
Ar changkang – broiler, layer, rainbow rooster, leghorn etc kan vulh a, vitamins leh chawttha tinrêng nên. Australian vawk chi tha ngat vulha duat tinrenga kan khàwi lai hian, thil pakhat kan hmaih fo – sanitation + manure production. Kan Ran In chhung kan tifai hliau a, a hnuai leh thlang lawkah zun-êk tlingkhawm tho leh rannung dangin an bawm huai huai a! Foreign tourist hipluh kan la tum ta deuh deuh a nih phei chuan, technology mumal deuh kan rawih a ngaih hmel!

Man to tak ran chaw leiin hah takin hnephnawl kan phurhsak a. Hautaka kan chaw buatsaihsakte hi an taksaah a inchheng vek thei bik lova. Tam zâwk fê an zun leh êk-ah an paihchhuak leh thin. Hei tak hi thlai chàwm nâna hman dan kan ngaihtuah a ttul khawp mai. Google lam kan ràwn chuan ar-êk NPK ratio hi – 1.1% : 0.8% : 0.5% vêl a ni a. Vawk zun leh êk hi – 0.8% : 0.7% : 0.5% a ni thung a. Heng bâkah hian hêng ran-êk tawih tawhah hian thlai chaw tenau (micronutrient) chi sawm (Magnesium, Sulphur, Calcium, Copper, Molybdenum, Chlorine, Zinc, Iron, Boron leh Manganese)-te hi a kim tlat bawk. Chubâkah, thlai puitu ttangkai microbes tamtak an la awm cheu bawk. Heti taka buaipui tlâk thlai chaw pài vawk/ar ningnawite hi kan khuahkhirh dawn a nih a in kan sak danin a zir a ngai ve bawk thin. Tenawm leh rimchhia mai a nih loh nân te, leitha engemaw zât kan intodelh nân te, hautaka kan sum leh tha sèn ral kan hmuh lêt theih dan kawng khat leh kan nunphung tihchangkàn nân te rilru thar kan put a tul khawp mai.

Plastic bur emaw Sarang lianah a mawngdâp atân lei tlêm kan dah ang a. Vawk/ar ningnawi kan chhung zel ang a. Ar-êk bik hi chu tho tui keu tur a ken thin avângin (a lungin sarang an ei-pawp thin a) plastic a ngai deuh kher thin. Chutih rualin plastic/mau pipe (a pang zawng zawng, hmunphiah kuang tiat vela a tluana verhkuak thliah thliah) hi a laiah kan zuk rawlh ang a, a mawng thlengin. A bur a len deuh chuan hetiang pipe hi 3/4 pawh rawlh a tha, a chhinna dal lo tâwkin kan tan leh ang. Êk titawihtu microbes-te boruaka chàwmna tur a ni. Tin, bur/sarang hi daihlimah kan dah bawk ang a. Hetih rual hian thei kâwr chansawm, chawhmeh ningnawi etc tlêm telh hlek hlek bawk nise, hei hian kan leittha siam tur kha a ti quality lehzual ang a, a tawih rimchhe lutuk tur a vêng bawk ang. Tichuan, êk ningnawi kan dahluh thar apiangin Lactic acid bacteria leh Nature Vel (thil titawihtu microbes tangkai dahkhawm) tlêm kan telh zel ang a, hei hian rang takin a titawih dawn a ni. Tho lût thei lo, boruak lût/chhuak thei tâwk siin kan chhinphui zel ang. Dahluh hnuhnun ber atanga thla khat hnu-ah chuan, a uih a reh tawh ang a, a hman tlâk tawh ang. Thingpuife ang maiin a lo phut dum surh tawh ang a, kan dahthat duh chuan, cement bag leh thildang remchângah tãwn phuia dahin, hmun hulah kan dahtha ang a. Hmanna tur mitthla-ah a lang zut zut mai ang, Vermicompost aiin a quality daih ania! Vawikhat tichhin tawh chuan an zawngchhang tlangpui – thlaite hian an mamawh ang chawtha an hmuh chuan an than a tha-in zuva leh natna lakah an him bik ania!

KHAWMUAL CHENGKAWL
Tun laiin Mizoram hmun hrang hrangah Chengkawl lian pui pui khawmualah hmuh tur an awm a. Kan thlai chinte pawh an eichhe tthin. Chengkawl naràn sa-ah hian Protein 15%, Fats 2.4% bâkah fatty acids, calcium, iron, Selenium, magnesium leh Vitamin E, A, K & B12 a awm a. Hei vàng hian chhum hmin emaw rawh hmin emaw hnu-ah kher chhuahsakin vawk/ar chaw tha tak a ni a. A kâwr hi (chhutsawm emaw rawh vâp hnu-ah) thlai bula phum/phulin thlai rah titamtu leh quality siamtu (Phosphorus leh Calcium) a awm tha hle bawk. Hetiang ti theilo tan pawh, a nung chunga chhu kehin, thei kung bulah phûmin a tha êm êm. Harsatna emaw kan tih tam tak hi malsawmnaah chantir a hun tawh e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy