Daily Newspaper

BASICS IN AGRICULTURE – IX

427

RK Dawla
Ramlaitui
Mb 9366095658

Phai lam leh mi ram thlai chin te, an tihdan leh enkawl dan angin thlai kan buaipui ṭhin a; mahsela result ropui kan nei mawhin hma kan sawn thui theilo khawp niin a lang. Hei vàng hian kan ram mil, a awih dan ang anga enkawl dan, ruahtui tla mil, sik leh sa mila thlai enkawl dan kan zawn chhuah a ngaiin a hun takzet e. Hmakhawsang aṭanga kan zopa thiamthil  tlangram lo neih  lah hi a system a upa tawh lutuk a! Chubâkah, khawvêl lo ṭhang zêl hian a mil tawh chiah lo bawk nên. Chutiang atân chuan kan rama Pathianin hnianghnara a dahsate hman ṭangkai kan mamawh takzet niin a lang.

IMO (INDIGENOUS MICRO-ORGANISM) SIAMPUN DAN

Thingin box an siam a, thingrem chhin neilo te tak tê a nih chu. Fai leh mám takin an nâwtfai a. Chutah chuan buh (rice), rum el awl, taiváng tui ṭhah maia chhum hmin chu a chanve thleng lo deuhin dah a, nemmuk loh tur. Blank Paper fai taka tuam hnu-ah rubber band hmanga ṭãwn thlap tur a ni. Nisa em theih loh, ramhnuai sadai-êk tamna, a hnahthel ro tling kára hmuar var inpha-man riak (mycelium) awmna kan chhinchhiah ang a. Chutah chuan kan box chu a chanve pilin kan phum ang a. A chungah hnahthel ro leh thing ṭang nawiin box lang lo tâwkin kan haivur ang a, zuva-in an khawih loh nan thirlen emaw-in khuh a ngai ve bawk a.

Kan box phum chu (thlasikah ni 5-6, nipuiah ni 2-3 hnu-ah) kan hãihawng ang a. Hmuar var, lapua ang takin buh a lo bawm chûk a nih chuan kan hlawhtling tihna a ni ang a; hmuar dum lamin a lo bawh a nih erawh chuan microbes ṭangkailo an nih avàngin paih tur. Hmuar var iar-ho chu microbes ṭangkai kan tihho kha an ni a. Chu chu IMO-1 an ti.

IMO-1 chu a buk zât chiah kurtai/brown sugar nên dim te-in plastic bungbelah kan hmehpawlh uluk ang a. Hetia hmehpawlh hnu hi IMO-2 a lo ni ta. Chu chu plastic/glass burah kan dah ang a, blank paper fai leh rubber band-in kan chhin leh ang a, ni eng hmu lo chhuarah kan dahṭha ang.

IMO-2 chu a rihna lêt 1000 tui kan pawlh hnu-ah, kuta hmeh hlawm theih tâwkin favai/wheat-vai kan pawlh hnu-ah hmun hul leh nisa em theih lohna lei chárah khâp khat vela sángin kan chapparh ang a. Buhpawl chapparh hmangin kan khuh lehin, a chung berah buara bag hlài parhin kan khuh ang. A chhung a sat lutuk loh nân ni khat danah buara leh buhpawl hi kan hawng ang a, suahdur faiin kan chawklet thin ang (50 oC aia sáng lo turin). Tichuan, ni 6-7 hnu-ah chuan microbes ṭangkai, kan rama mi ngei, tam maksak lutuk kan nei ta tihna a ni. A rim pawh a tui hle ang a, hei hi IMO-3 an ti. Buhpawl kher kher kan hman hian, buh kunga microbes ṭangkai – Aspergillus’s oryzae, Bacillus subtilis etc kan khawipung tel dawn tihna a ni a, manhla tham tak a ni.

Tichuan, IMO-3 hi buara bag-ah kan thun ang a, hmun hul leh thaw-lêng, nisa em buai lovah kan dahṭha thei ta a. Duhthusàm chuan kan dahna hmun turah hian a chhuatphah-ah (IMO bag dah hma-in) buhpawl kha dah hmasak a ṭha bawk.

IMO-3 hi 10 Kg, huan lei chunglâng 5 Kg leh Minerals tamna sawntlung lei tih-nawi 5 Kg nên lei chárah chawhpawlhin, thlai chinna tur bi-ah emaw thlai awmsa bulah emaw phum kual tawh mai tur a ni. Pawimawh ber chu IMO kan pêkna thlai bul hi hnim ro hmanga khuh ngei ngei tur a ni. Hei hian IMO hrikte khawsak zelna turah thui tak a pui dawn a ni. Heng hrik ṭangkai fuankhawm tihpun hian bacteria, fungi, protozoa leh yeast tam tak – thlai chaw siamsaktu te, natna laka thlai vêngtu te bâkah leilung tihriseltute mahni ngeiin kan siamin kan hmang thei dawn tihna a nih chu.

WOOD VINEGAR ṬHA BER CHI  I SIAMCHAWP THEI

Rannung vàngin kan thlaiten harsatna (pest problem) tam tak an tâwk a. Ṭhalah thlai tui khamlo hmel hmuh a hrehawm êm êm bawk. Hah thikula tui kan pêk pawh boruak ro vànga ral leh thuaiin lei a khal ban sak hman fo. Heng harsatna chingfel dan kawng khat chu wood vinegar siam hi a ni. Company lamin Fractional distillation hmanraw khir pui pui hmanga an thlitfim aia quality zâwk mahniin kan siam thei e. Thingtlangah phei chuan, siam a awlsam êm êm a, thlasik ài tur meihawl rawh pahin a remchâng hle. Amaherawhchu, hetianga mahnia kan siamchawp hi chu mihring ei atân a tlâk loh tih hriat tur a ni.

Tuizém angin (alkatra barrel pian ang hian) rangva chhah chi (mahni remchan tâwka lian) an khãwr a. Leiah an mut a, a hmai hnung lam sáng lai berah meikhu chhuahna an vuah a. Tin, leivungin barrel hi an vur phui bawk. A hmai hma lamah thingṭang ilo rawlh luhna tur rek-kuain, chhin theihin an siam a. A chhungah chuan thingṭang ro an rem a. A hma lamah mei chhémin, thing dahluh a mût kái ṭha ta tih-ah phui lo deuh hlekin an chhin a. A khu chhuahna lamah meikhu var chhah tak a rawn chhuah hunah chauh, mautlawn (Iron rod hmanga a chang sawh kuak tlang) nên a meikhuchhuah rangva khawr mùm chu an chuktuahin chirh belin puan chhah tak tihhuh-in an tuam leh vek a. Tichuan, mautlawn hmáwrah chuan a khu zawng zawng a lo chhuak ta ngiai ngiai ṭhin. Mautlawn hi puanhuhin an tuam leh vek a.

Meikhu chhuahna rangva leh mautlawn kan zawmna aṭanga tawng khat vela hlaah chuan, mau pang hnuailam chu kan rek kua ang a. Chutah chuan, wood vinegar chu a rawn far keuh keuh ang. Chu chu plastic bur dawhin, mau hnaih takah thirzaiin kan khai ang a. Hetih lai hian, mautlawn tuamtu puan kha tuiin an leih dài zeuh zeuh bawk a. Kan thil muh a mut zawh tawh dawn lama meikhu sen ngiai ngiai a lo lan ṭan hunah, meihawl-tui dawh kha lâksawn daih tawh tur a ni. Tichuan, a mut zawh hunah chuan, barrel hma lam leh meikhu chhuahna lam chu an hnawhphui ta vek a, ni 2 hnu-ah chuan meihawl a lâkchhuah theih ta thin.

Wood vinegar kan lak hi thla 3 tal che lova plastic bur lang tlang thei-ah dah vang vang hnu-in, chhawng 3 a lo insiam ang a. A chung berah oil awmin, a laiah wood vinegar. A hnuai berah a êkchhia (tar) a lo awm ang. A laia mi hi agriculture-a kan hman tur tak chu niin, pipe te deuh hmangin a vinegar chin hi hîpchhuah tawh mai tur a ni. Next Monday-ah chuan, wood vinegar hnathawh leh hman dan lam kan hrût thei tawh ang chu.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy