Daily Newspaper

BASICS IN AGRICULTURE – LXVIII

75

Kan sawi tawh thin angin farmer-te hian, tun lai khawvelah chuan, risk ni lovin technical leh research based deuha thil kan kalpui a hun tawh hle mai a. Chutiang tur chuan kan knowledge kan tah-hriam a ngai hle mai a. Chuvàngin, he article pawh hi a hlu hle dawn a, a ngaihnawm hle dawn bawk a ni. Tin, Youtube-ah – ‘Thlai chaw – Phosphorus’ tiin kan dah bawk e. Awle, Phosphorus hi thlai chaw mamawh tam zinga pakhat ni mah sela, kan Mizoram leilungah hian thlaiin an ei mai theih (available Phosphorus) kha chuti lua-in a tam lo hle a. Chutiangin, kan leitha hmuh awlsamho – hnim tawih, thukvut, ran-êk leh ramchang lei chunglâng hâng leh Sa-dai-êk meuh pawh hian a keng tam hauh lo mai a. Chutih laiin thlai tan a pawimawh nasa hle mai si a, ngun taka kan ngaihthlâk a ngai dawn a ni. Chemical version chuan Phosphorus hi SSP (Single Superphosphate) te, NPK Triple 19 leh DAP te hian an keng tha a. Mahsela, kan Mizoram leilung, ruahtui baw-hawk dawng thin leh a tam ber hmun awih-ah hi chuan tuia zawp ral thei leithate hi hman dan thiam a harin ngaihtuah an tithui hle mai a. Tin, chemical leithate hian Soil ecosystem an tichhia a, chu chuan khua reiah leilungah harsatna tam tak a thlen thin.

Nitrogen awm khawmna turin Pathianin kan chhehvel boruak hi a hmang a, Phosphorus dahkhawm nan erawh lung chikhat Phosphate Rock a hmang thung. Rock Phosphate, Phosphorus tamna lungte chu tikeh sawmin acid nen an chawhral hnu-ah Phosphorus awmna leithate hi siam an ni thin. SSP hian 20% vel Phosphorus a keng a, DAP hian 46% vel Phosphorus a keng thung. Triple 19 NPK erawh chuan 19% Phosphorus a keng e. Vanduaithlâk takin kan Mizoram leilungah hian Phosphorus tawm khawmna, Phosphate Rock hi kan nei ve lo niin a lang.

Nitrogen kal kual dan kan hre tawh a, Phosphorus kal kual dan kha hriat ngei a ngai bawk a… Phosphorus awm tamna lung chu a kehnawi a, a kehnawi chu lei hrik (microbes)-te khan thilto tinreng ei theih turin an phel sawm (solubilize) leh a. Kan leilungah hrim hrim pawh hian microbes-te la phelsawm loh Phosphorus mur-te chu darhsarh takin an tla sung sung tih hre tel bawk ila. Tichuan, thiltoten microbes phel fel sa phosphorus chu eiin an taksa pêng tinrêngah an thawn darh a. Thilto taksaah hian Phosphorus chu tlem te te-in a insemrual a – a hnah, rah, kung leh zungah te. Nungcha tinreng leh mihringten chung thilto taksa engemaw ber lai kan ei apiang khan kan ruh (bone)-ah a inchhêkkhawl ta zel a. A inchhêk thei lo chin kan zun leh êk-ah tlem tlemin kan paihchhuak reng bawk. Tichuan, nungchate zun-êk atang chuan leilungah Phosphorus chu, microbes-te eiral turin a kir leh a. Nungchate ruh-ruang, Phosphorus keng tamtu ber pawh muangchângin hetiang hian leilungah a kir leh ta thin. Kan hrethiam em?

Thlaiin Phosphorus an hmanna:
Kan hriat awlsam zawngin Phosphorus chu thlai zung titamtu, chawr leh pâr (flower) chhuah tamtirtu a ni ber a. Pangngai taka thlai a than theih nan a zung lam a pawimawhzia chu t?hál tuihna ang chiah a ni mai. Tuihna a that loh chuan a tlàntu mihring an tam thei lo. Tuihna tha lo mi tam takin an tlan rawn chuan hmai phihna khawp an hawn liam liam ang a, chu zawng chu! Phosphorus pawimawhzia chu kan hrethiam ti r’u? Hei chauh lo pawh hi thlai taksa khawi lai pawh, a thang lai tawh phawt chuan an mamawh a ni. Chawrno thar insiam tur te, par chhuak tur te, thlai chi insiam tan tur leh chaw zawngtu zung thar chhuah tur khan Phosphorus khamkhawp hi..loh-theih-loh a ni bur mai! Phosphorus tlachham chu thlai hnah rualkhai takin a dawldâng ang a, a taksa pêng tinrengin tuana saruh khelin a zung a tamin a chak thei hek lovang a, thlai taksa chhungah tàm a tla dawn tihna a nih chu. Ka unau, Phosphorus tlachham chu a hnah chang lam hnuai keu la, a purple bawk ang aw…

A nih leh kan Mizoram leilunga Phosphorus tlem hle si, engah nge kan kawmthlang theihai leh thenawmte sertawk hi a zung a thuiin a va par tam si ve i ti rilru tiraw? Ngaithla ngun teh le! Pa leh hmuar lam chite hi Fungi tiin an sawi thin a. A then chu an ei tham a, a then an hmuh tham miah loh, mit-lâwngin. Legumes zunga Rhizobium bacteria a bâwk tangkai ang deuh khan, fungi chhungkaw thenkhat, mycorrhizal fungi an tihte chu thilto lian chiho zungah hian a invêt phan chuai thin a! Chungho chuan thlai chaw siamsa tlem an eipui a, a lêtah thlai zung tan chaw an zawnsak thin alawm – a bikin Nitrogen leh Phosphorus! Heng mycorrhizal fungi-ho hi an han vâk chipchiar-kàwmkár thin khawp a, thlai zungsam thlen phâk lohna pawh kha an luhchhuah zung zung mai thin a! Hei vang vek hi alawm lei chhiat hmel deuha thing leh thlai an rah tuar le!

Phosphorus awm thatna thilte:

Saruh tinrêngah, khawmual leh luisa zawng zawng kawr leh ruh-ah. Khawmual saruh-ah phei chuan Phosphorus hi 42% vel daih a awm! Bazar-a an sangha phuhlip paih mai mai khan 10% vel daih Phosphorus a keng ania aw… Hman deuha in bawng ke lei ruh fil kha a va uihawm ta êm! Chakai kawrte kha lung nuai nuai khawpin in bawlhhlawh bawmah in lo paih vel a! Artui kawr-ah pawh hian 1% chu Phosphorus a awm a. Hei hi Phosphorus atân chuan a tlem miah lo. Ran-êk leh hnim tawih-ah pawh heti bak a awm hauh lo ania! Balhla kawr-ah hian a tam leh deuh a, 3.25% vel a awm. Chutia nih loh chuan mihring leh ran zunah a ni tawh mai, 750mg vel litre khat zêlah a awm. Video hmasa lama kan sawi, Zun leh chinai mix kha Nitrogen source chauh ni lovin Phosphorus source pawh a ni tel ania. Kan ram leilunga Phosphorus tlèmzia leh thlaiin an mamawh si-zia hrechiang tak taktu tan chuan ar ringruh zungchal chen pawh a hlu mawle! Heti hian kan ti thin – Saruh chi hrang hrangte hi kan rawh a, kan chhu dip leh a, bone ash an tia, Phosphorus hnar tha lutuk tak mai a ni. Lo pe tam deuh pawh ni ila, Nitrogen angin thlai a kàng ve thei lova. Tin, vawikhat pêk kha thlaiin a ei har deuh na a, a daihrei êm êm. Dawra an zawrh thin bonemeal hi saruh hersawm alawm! Phosphorus chauh kan chhût chuan saruh kg 1 leh chawtha tinrenga chawm ar-êk kg 21 a inhen!

Heti hian ka hrilh ru ang che – thlai i enkawl ve a, Mizoram leilunga Phosphorus tlèmzia i hriat hnu pawha i danglam miah lo a nih chuan, i thing ru veng veng a nia! Heng kan thil sawi hi pianthar phah nan i hmang a nih chuan, thil pakhat ka hrilh leh ang che – thlai damdawi ilo zawrhnaah kal la, Trichoderma va lei la. A dose tur zat tuipawlhin leilung hnâwn laiin thlai bulah i leih kual dawn nia. Trichoderma chu a chunga kan sawi tawh, Mycorrhizal Fungi kan tih chi khat a ni e. Thlai chi nuai nân, soil mix atân leh compost siam nân pawh a hman theih e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy