Daily Newspaper

BASICS IN AGRICULTURE – V

39

-RK Dawla
Ramlaitui
Mb 9366095658

New Millennium rahka kan pelhna pawh ṭhangkhat lian zet a nih tawh hnu leh India rama mihring thàwlna ber pahnihna (Arunachal dawt chiah) kan nih mêk lai hian, kan ram neihte hmang ṭangkai lo ber pawl kan ni lawi a. Pi leh pu aṭanga kan inhlanchhãwn kum tin lo neih kan bànsan hleih theih miah loh chhan hi chhui tham fê a awm ang. Protected cultivation leh Jhuming inkâr, a náwlpuiin kan la chingfel hlei theilo hi thil buaithlâk leh pawi tak a ni. Chhan tam tak a awm ang – kan rama resource awmsa kan hman ṭangkai thiam loh vàng leh kan ram sik leh sa mila leilung enkawl (thlai enkawl) kan thiam tâwk loh vàng a ni pakhat ngei ang. Kuthnathawktute moral a hniam a, tha thona leh hriatna mumal kan tlâkchham bawk si chuan, engtikah mah kan ram hi a dingchhuakin a rinawm tlat loh a ni!

TROPICAL ECOSYSTEM HI ENGE NI?

Khawvêla sik leh sa hrang hrangte hian nihphung an nei hrang ṭheuh a. Keini pawh ram lum, hun bi neia ruahtui dawng ṭhin ram (Tropical monsoon) kan ni a. Hei vàng hian kan hmunhma-a thilsiam tinrêngte inrintawn dan (ecosystem) pawhin ze hran a nei ṭhin. Khuarel ramngaw-ah hian danglam bik kan ecosystem chu hmuh theihin a awm a. Hemi kalphung (formula) hi agriculture-ah kan zawm a pawimawh hle. Kan ramngaw-ahte chuan, thing sang pui pui emaw mau hmun bawn tak tak a awm a, hruizámin a bawh chek chuk a. A hnuaiah thing tê deuh – pelh, aidu, sakhi tuibur etc an awm thung a. Lei hrúla lung awm chhun leh thingkung pangte chu lungsamin a bawh hring nghelh a. A khât tâwkin changel leh hnahthialin a pawlh a.  Thilṭo chi hrang 100 chuangte ram ṭin khat hmun maiah pawh a awm ṭhin. Hmun ṭhenkhatah sakuh, bui &0 saphu kua leh an leivung siam a bâwk thluah bawk.

Sáng taka thing leh mau khawsate hian Ni eng dawng hmasa-in an thlifim a, an hman ṭangkai bãk chu an hnuaia thilṭo dangten an lo chhawrbâwk a. An hnah , ṭang, rah leh rah eitu nungchate êk chuan leiah biomass chãwl lovin a dahlêt reng a. Thing lian tak tak zungte chuan lei chhungril thûk taka thlai chaw (minerals) awmte chu lei chunglángah an dah chhuak a, hei hi sakuh leh saphu vûngin a pui bawk a. Leilung chu englai pawhin thilṭo ruang ilovin a khuh tlat avângin nisá leh ruahtuiin direct-in a khawih thei lova, lei a kalral mang tlat lo. A kalral lêt engemaw zât a insiambelh zâwk. Chu chu changpãt leh microbes-te tân Paradise niin nuam tin an tãwl a. Heng zawng zawng vàng hian ramhnuai Bil-thei, Theipalingkawh, Vawmva etc pawh kum tin a rah kúr ngiai nguai mai ṭhin! Pawn lam aṭanga leiṭha dahluh a ngai miah lo!

KHAWNGE THLAI CHAW?

Khawiah pawh thlai kan chin dawnin, ‘eng leiṭha/chawṭha nge kan pêk dawn’ tih aia pawimawh hmasa chu – kan thlai chinna tur leilung nihphung kha a ni. A thûr leh thûr loh a pawimawh hmasa ber a, a dawtah kha leilungin a thlai chaw pàite, a  kalral/riral tur vèn kha. Lei a thûr miau chuan, thlaiin chaw a ei ṭha thei lova. Lei thûr chhan ber chu thilṭawih thlì tharlam (humus) ruahtuiin a tlenfai fo vàng a ni a. Humus hi khuarel leithûr vêng tlattu rinawm niin, tuiah a zawpral thei a ni. Leilunga nutrient kalkual dan hi kan hriatthiam hmasak ngat chuan, pawn lam aṭanga thlai chaw (leiṭha) chàwkluh ngai a titlém hle dawn tihna a ni. Tropical region-ah kan awm miau avângin, thil a ṭawih chak a. Kan ram a awihtlàn bawk avàngin thil ṭawih thlì (lei hànna/thlai chaw kengtu) kha ruahtuiin a len bo zêl avângin leilung a da hma bik êm êm a ni. Chuvàngin nature kalphung, ramhnuaia kan hmuhte hi Agri lama kan sengluh thiam a pawimawh khawp mai. Tichuan, kan ram ang, tlangram awihpangah hian, thlai kumhlun chinna tura terrace laih duai duai ai chuan, lei khuhtu thlai lama ṭan lâk a pawimawh zâwk tih kan hrethiam em? A enkawl a awlsam zâwk nâna level thlapa footpath laih erawh thudang.

LEIṬHA TUI (LIQUID MANURE)

Zawhna chipchiar dawn tam ber a nih avângin luhchilh leh lawk ila… Issue hmasa lama Zopa chawhchawrawi kan tih kha. Leiṭha tui siamchawpte hi leiṭha dangho aiin a dal zâwk a, thlaiin an ei nghal theih mai avàngin hman a nuam a. Tin, ran-êk, hnim leh kan ningnawite – thlai ei theih tura upṭawih chhung a rei ṭhin a. Tuirila siam mai hian hun a duh rei lova, ṭhalah thlai tui pêka telh mai theih a nih avàngin hna a zãi deuh bawk. Chubâkah, ningnawi tinrêng vawmkhawma leiṭha tui kan siamah hian, tlêm thama thlai chaw mamawhho (micronutrient) a kim avàngin company siamsa (Multiplex ilo) lei lovin kan awm theih phah bawk.

Thlai chaw mamawh dan tlangpui : A ṭiah tirh aṭanga a pár tur kuhmùm insiam thleng hian Nitrogen an mamawh tam. Kuhmùm aṭanga a rah sên insiam thlengin Phosphorus. A rah sên insiam aṭanga a hmin thleng hian Potassium. Amaherawhchu, saruh lam hmanga Phosphorus kan supply dawn a nih chuan, a ṭiah hma aṭanga leia lo dah lâwk a ngai ve ṭhin. Hei hi a chhan chu saruh lampang hi thlai ei theih turin microbes-ten an eiṭawih hmasak a ngaih vàng a ni. Nitrogen bik hi englai pawhin an mamawh reng bawk, thlasika thlaite an mutthilh lai chauh lo chuan.

Leiṭha tui siam tura thil mamawhte – ṭawih tur thil (ningnawi engkim, ran-êk, hnim hnah, rah etc), tiṭawihtu microbes leh an awmna thil – LAB, Nature Vel, Sadài-êk, ramhnuai lei etc) leh microbes tiphurtu (kurtai, molasses, chini, chawṭhing etc). Pawimawh ta chu thlai chaw bulpui pathum – Nitrogen (N), Phosphorus (P) leh Potassium (K) awm tam dan kha a ni ta a. Saruh (Phosphorus) pêk dan awlsam ber chu rawh vâpa chhutsawmin. Ar-êk leh Vawk-êk-ah hian Nitrogen a tam a, Phosphorus a vantlâng a, Potassium a tlêm thung. Hemi compensate tur hian Potassium tamna thei & thlai kâwr (balhla kâwr, Alu kâwr, thukvut) kan leiṭha tui siamah telh a ṭul ṭhin.

Lui lam sa hi an ṭawih hma deuh a. Bazar sangha phuhlip & ningnawi, chak-ai kâwr & êk nawi chen hian leiṭha siamna hmanraw ṭha lutuk mai an ni. Khawmual sa ningnawi pawh uihawm khawpin a ṭha. Vaiho bawngruh herdip bonemeal lei kher lo hian mahni intodelh dan kawng a awm ngei ang. Thingtlángah phei chuan, lui lam sa free kan ei nasa a, Chak-ai leh Chengkawl kâwr chenin thlai chawṭha lutuk pãi an ni. Ruh changho erawh tui nêna kan up fil tawh hnu hi rawh vâp a, chhutsawm tluk a awm lo thung ang, thlaiin an ei hma theih nân. Kurtai/molasses nêna thla khat up hnu tui chu hlu tak a ni. A tuia insiam bang (ruh fil)-ah hian thlai par tamtirtu Phosphorus leh a rah tiliantu Calcium buaipui tham a awm bawk. Tin, thlai (ṭhang tha theilo, a hnah eng deuh piap leh sîn reng mai) tlâkchham ṭhin Zinc hi favai-ah hian a tam hle bawk, leiṭha tui siamah thingtlãng lam chuan telh ngei kan bá e….

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

1 Comment
  1. Chhunga says

    A ngaihnawmin a pawmawm hle mai. Pu RK, i tawnhriat ngei mai chipchiar tak mai a i ziak ṭhin hian i column a ti hlu a ni. Zoram tan hian lo dam vawng vawng ang che.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy