Daily Newspaper

BASICS IN AGRICULTURE – VIII

22

-RK Dawla
Ramlaitui
Mb 9366095658

Ramdangah chuan, thlai chin dawnin thil hautak zet an buaipui hmasak ṭhin chu leilung buatsaih a ni ṭhin. Thlai ṭhat theihna tur ngeia lei siamrem hmasa-in thlai chaw ei tur tam tak a chinna tur bi-ah an lo dahlâwk ṭhin. Pomegranate mai mai ching tur pawhin thlur neiin lei an haipâwng a, khur an lai leh a. Chutah chuan chinai thi (lei thur tirehtu) te, Bonemeal/Superphosphate (a par leh rah titamtu) leh organic leiṭha (bawng-êk ro) an chawhpawlh hnu-ah thlai an phun ta chauh ṭhin. Tin, drip irrigation an fit thlap bawk. An ram a zawlin a zál zawk tlangpui a lehnghal a; ram awihtlana thlai ching, lei kalral tuar nasa zâwk hian Monsoon rama kan chenpuite hi (leilung buatsaih kawngah) kan phalo hle niin a lang. Hei hi anni aia kan tharhlawk lohna chhan lian tak a tling ngei ang. Ramngaw ṭhiat leh hâlfaiin bul kan ṭan mawl tawp a, kan leilung a awih avàngin lei chunglánga thlai chawte ruahtuiin a tleuh ral zêl a. Hei vàng hian chaw kawpuar hmu lo kan thlaite chu an ṭhat tur angin an ṭha thei lova, natna an ngah bikin rahchhuah hlâwk tak tak kan hmu theilo fo ṭhin. Kan chhungkaw eibél tur kan thlai chinna hmunhmate chu kan YMA PARK sàm mai mai a! Heti chunga rah an la chhuah hrâm hrâmte hi chu lawm tak tur kan ni zâwkin a lang.

MICROBIAL AGRICULTURE

Agri hi mak deuh mai ania, hmuh theih khawl lian pui pui ai chuan hmuh theih loh hrik te tak tê tê (microbes)-te hian hna an lo thawk ropui zawk a! Anni hi thlai eitur siamtu ber niin, an tam leh tlemin thlai nihphung a khawih nasa hle a. Kan ram ang, ram awihtlan tamna-ah phei chuan, ruahtui vànga leilung kalral hian, microbes a nghawng nasa hle a. Microbes-te hi ‘an hnawk e’ tiin chemical thil ilo hmangin suat rêm tum mah ila, kan hmunhma ata hi kan suat rêm tak tak thei tlat lo. Chubâkah a ṭangkaiho nên lam kan suat a! Thli leh ruahtui ringawt pawhin kan hmunhmaah an rawn thehlut leh tho tho ṭhin, an inthlahpung chak êm êm bawk.

Chuvàngin, kan hmunhmaa hrik ṭha-mi siampun mai kha a finthlâkin a daihrei zawk dawn tih a chiang a. Tichuan hrik ṭha-mite chuan a hlauhawmho an tamhneh thei tih ramhnuai ecosystem leh vermicompost hmanga kan thlai chinte hian a tilang chiang hle bawk. Amaherawhchu, heng hrik ṭangkai hmanga thlai enkawl hi hunrei duh thil a ni a, process tam tak paltlang ngai a ni bawk. A chhan chu environment (biomass production, thlai chinpawlh, sik leh sa etc) nên a inzawm tlat vàng a ni. A awlsam zawngin sawi ila – Saruh hersawm leh ar-êk/bawng êk hi thlai chaw a ni nghal mai lova, thlaiin an ei thei hek lo. An ei theih tur chuan, leihrik (microbes) pumpui leh rilfang te tak tê tê a kaltlang a ngai a nih chu. Luang leh wheat-vai inpawlh chu kan ei thei lo; mahsela Bawngin a ei a, chuta ‘ṭanga hnute lo insiam chu chawṭha tak a ni daih! Ningnawi tinrêng leh ran-êk te, thilṭo rah leh hnah tinreng kan upṭawih hian, microbes ṭangkai tam tak kan siampung a. An chaw siamsa bâkah a siamtu tam tham tak kan thlai chinna leilungah kan chhuah leh a ṭul takzet.

INDIGENOUS MICRO-ORGANISM (IMO)

IMO kan tih chuan, kan chênna ram chhunga Pathianin hrik (microbes) ṭangkai a dahsate sawina a ni a, company siampun sa bio-fertilizers, bio-fungicides-ho hi an ni lo thung. Thlaite eitur chaw siamchhuaktu microbes-te hi, natna laka thlai vengtu ber an nih bawk avàngin an pawimawh êm êm a. Ramdang aṭanga lakluhte hian, an khawsak tharna lamah environment mil lovin hna an thawk theilo fo. Hei vàng hian kan rama awmsa microbes-te hi an awmna ramhnuai ngaw aṭanga kan thlemchhuah a, kan khawipun a, kan hmunhmaah kan chhuah leh hi a ṭul hle. Kan thlai chin azir bâkah nisa leh ruahtui vàngin kan hmunhmaah tam tham tak an kalral a, microbes a balance ṭhin lova. Chutih rualin an chèn zuina tlâka kan huan/hmunhma leilung kan buatsaih a ṭul hle bawk. Microbes inbûktâwk loh vàng hian thlaiin natna an ngah êm êm a, sik leh sa inthlâk hlekah thlai hri a puang fo ṭhin. Microbes balance-na hmuna thlai chinte chuan, chawṭha supply-tu leh natna vensaktu an neih ṭhat avàngin an hrisel ṭha a. Thlai hrisel chuan amah hrim hrim-ah hri do theihna leh rannung ṭhalo hnawhkian theihna a nei tih hi Zopa ramchang thlai hian a tichiang hle àwm e. Karleh thawhṭan lamah chuan IMO mahni-a siam dan lam kan thlur dawn nia.

CARBONISED RICE HULL

Leilet leh thingtlang buh kan seng a, fasuar-ah buhsi tam tak kan thianfai a. Buhhum kan her a, favai hram tam tak a chhuak bawk. A buh tak leh buhfai ni lovin, a si leh favai hram zâwk hi belchiang ang: Buhsi leh favai hram hi ‘rice hull’ chu a ni a, ‘Carbonised’ chu meihawla chantir tihna a ni. ‘Rice hull’ hi a ṭawih mai lova, lei ban a tithawlêngin leilungin tui a pai tam theih phah a, lei chhungah thlai mamawh tâwk boruak a awmtir bawk. Ram changkang hovin Greenhouse leh Potting mix atâna an hman ṭhin – perlite (sailungvar nawi) te, pumice (lung ni si, tuia lâng thei) leh Lava rocks (tlángkàng lungnawi) ai hian a nêp chuang lo mai ni lovin a thlanawm zâwk. Online shopping hmangin favai hram/buhsi (hàl loh) hi chah dawn ta ila, 2 Kg pack lek pawh hi ₹499/- a ni daih asin!

Favai hram leh buhsi hi chhepkhawmin an hâl/mût a. A mût lai kha a chhungrilah awm turin an vûr zel a, thlithaw-in a mût/kàng lai a tibuai theilo (limited supply of oxygen) a nih chu. A mût zo ta tih veleh tuiin an leih hlum a, a hawl lo insiam chu Carbonised rice hull a ni ta a ni. Tichuan he CRH (Carbonised rice hull) hi alawm soil amendment atana duhthusàm ni ta chu. A pH hi 7.5 vel niin, chinai thi ang deuhin thlai chinna tur leilungah an thehdarh ta chiam ṭhin. CRH hian 94% vel silica (Silicon dioxide) a pãi a. He silica hi lungchanga kan hmuh ang chi ni lovin organic (thilnung aṭanga chhuak) a nih tlat avàngin thlaiin a chhawr nghal thei mai a, active silica an ti kher ṭhin. Tichuan CRH/Silica hian hrik ṭangkaite tawmbûk a siamsak a. Lei ban tak, boruak pãi theilo pawh boruak keng thei turin a tithawlêng a. Ṭhál khawro laia thlai mamawh tui a lo kensak a, thlasik khawvawt tak kârah pawh thlai zung mamawh lum (heat) a siamsak a. Tin, he active silica hi thlai cell-in a mamawh ang a hmuh chuan a hriselin natna a do chak phah a, rah a chhuah hlâwk phah ta ṭhin. Research ṭhenkhatah chuan CRH hman tel hian thlai thar 16-35% thlengin a tihlâwk thei an ti hial. Hei vàng hian a ni ang e active silica hi online shopping (India mart etc-ah) ₹45/Kg a nih laia DAP hi ₹25/Kg a nih thung ni!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy