Daily Newspaper

BASICS IN AGRICULTURE-XIX

15

RK Dawla
Ramlaitui
Mb 9366095658

Thlasik vanglai a ni a, thlai kumhlun tamzâwkte mutthilh lai niin, a then chu hnah tlakawlh emaw hnah chawrno thar chhuah tawh lo emaw an ni a. Evergreen kan tihho erawh chawrno thar an chhuah reng a. Tin, rannung leh natna tamzâwk chu khawvawt ro hian a hmet khingkhawng mêk a, nipui thâwta rawn pawrh pâwng thar leh turin. Engpawhnise, hei hi Siamtu duan dan a ni a, kan hriatthiam a tul e.

INTEGRATED PEST MANAGEMENT PEST kan tih hian thlai tâna natna thlen thei – rannung leh hnim, nematodes, bacteria, fungi tinrêng a huam a. Pesticide kan tih pawh hian rannung thahna chauh a huam lo hriat a tha awm e. Tun tumah hian Pest kan tihho zinga rannung (insect pest) chungchang chhui lawk ila : Rannung tam berte hi thlasik khawvawh laiin an thi rêm a, population tlemtê (a chi thlah tur) an damkhawchhuak chauh a. A nih loh leh lei chhungah an tui (egg) hmangin nipui khawlumin a kaihthawh nghâkin an tawm bawk a. February atanga rawn keuin, a damkhawchhuakho pawh tiamin chi thlah buaiin an buai ta thin. Environment-in a zir chuan an pung chak ta êm êm mai thin.

Thlai enkawltu tamtak hian he lam hi kan ngaihthah fo. Rannung duhzawng tih hriat reng reng, target crop kan chîng a. Rannung laka lo invèn lâwkna engmah kan ngaihven leh mang si lova. (Rannung chi thlahtu tlêm laia awlsama control theihna – Light trap, bottle trap etc – issue hmasa lama kan sawi tawhho kha a hmantlâk e). A nihna takah chuan kan thlai chinte nên chuan rannung eichhetu lo lan hun kan hmuak a ni ber! Chutah, a hlawp hlawpin an rawn lang ta a, ‘organic control ka duh’ ti mah ila, chemical hlauhawm hman a ngai ta tho tho, a dik em? Dragonfruit chinna hautakin kan siam a, a chàwmna tur leitha tinreng kan duhsak a ngaih bâkah renchem chunga tuipêk (Drip irrigation facility) nên kan thuam lai hian, rannung chi thlahpung tur suatna himdam bottle trap khai mai ai chuan, an lo lan huna chemical pesticide hmanga kah mai tha ti zâwk mithiam engzat tak nei ang i maw? Nature hi dimdawina tel lova tûr kan barh reng a nih chuan, a balance ngai lovang a, a sawhkhâwk kan tuar mawlh mawlh ang.

Pest management atâna thil tha tak pakhat chu rannung eitu savate tâna environment tha siamsak hi a ni. Tun laiah mi mawl intifing pui pui, air rifle t?ha pui pui nêna sava veh chîng kan awm thin, hengho hi thlangdar tluka thlai chingtute tâna hnawksak an ni! Savate hian kan mit aia fiah daih mit an nei a, kan hnu chhui theihna aia lêt tama thain Pathianin a thuam a. Kan hmunhmnaah ngampaa an eitur a awm a nih phawt chuan thlem an ngai rêng rêng lo, an lokal mai. Panhnah plot zim te kan siam a, chutah chuan bottle trap kan khai a, moths & mites tamtak an tlahlum reng a. Savate in tur tui kan dah a, a chang phei chuan phuihnam rah hminte kan dah a, rannung problem sawitham kan nei lo. A chang chuan Panhnah hlài tha tak takte pawh kha an lo êk-khum leh puat thin a, kan haw phal rêng rêng lo – kan lawm zâwk! Keini ai chuan caterpillar (pangngang) an hmu thei zâwk, an chaw a ni miau a!

SAWI NAWN FO NGAI pH Lei thûr/al dan pH kan tih hi leilunga Hydrogen leh Aluminium (positive charge ions) tamzâwng sawina a ni a. Heng pahnihte hi leilungah a tam chuan thlai chaw kan tihho kha an hip bet tlat a, thlai zungin minerals a ei hlei thei lo thin. Aluminium thirzai hi aluminium metal a ni a, thildang nên inbelhbawma a awm khan aluminium ions an ti, chutiang zelin element dang pawh an sawi t?hin. Tin, acidic soil (Aluminium leh hydrogen ions tam)-ah chuan tlêm tê-a thlai chaw mamawh Iron leh Manganese kha hnawksak (toxic) tham an rawn inlar thin bawk. Tin, lei a lo thûr chuan microbes tangkai kan tihte (tawih thei ei tawiha thlai tâna chaw ei theiha chantirtu) an che hlei thei tlat lo bawk.

Thlai chin dawna pawimawh hmasa ber chu a leilung kha neutral pH hnaih thei ang bera dah a ni. Hemi atân hian pH test paper naràn hmang pawhin kan hmunhma leilung pH a test theih tih kan sawi thin kha. Ruahtui baw-hawkna ram, Mizoramah chuan (kan hmunhma a awih tlangpui bawk nên) lei thûr vêngtu leh thlai chaw ni bawk (positive ions) – Potassium, Magnesium leh Calcium-te hi tuihâwkin tam tak a kal bopui a. Hengho rual hian an kawppui (lei al siamtu) – carbonates, bicarbonates, phosphates leh borates-ten mual an liam bawk! Mizorama kan thlai thar hlâwk loh chhan chu lei thûr control loh vang ti ila, kan sawi sual tam miah lovang! Hetia sawi mai ai hian a ril zâwk lehnghal!

Kàngvár-ah thlai kan ching dawn a nih ngawt loh chuan, lei thûr leh thûr loh hre hmasa-in thlai ching tawh ila. Lei thûr control nâna hmanraw hman theihte :

1. Chinai thi – Lehkhabu-ah kan chhiar thin, chinai thi hman dawn chuan lei lehphut tur tih hi. Mahsela, tlangram awih pang leithûr hi lehphut chi a ni chiah lo. Chuvàngin thlai bulah tlêm tê tê-a kum tin thalah thehdarh zeuh zeuh a tha zâwkin a rinawm. Tichuan, dài tla-in zawi zawiin lei chhungah a luhpui thei ang. Hman tam lutuk khan lei al lutuk (alkaline soil) a siam a, thlai tân a tha chuang love.

2. Meihawl dip – A pH hi 9 a ni tlangpui a. Lei thûr tireh theitu bâkah thlai tâna hnâwng chelhdingtu leh bacteria tangkai tawmbûk a ni nghal. Meihawl dip chhunga kua (pores) awmte hi a tê hle a, fungal hlauhawm a lût thei lova, a tangkaiho (Arbuscular mycorrhizal Fungi) an khawsa thei thung. Leilunga thlai chaw pût ral (leeching) vêngtu a ni nghal bawk. Chinai thi aia tam hman ngei a tha – thlai bulah.

3. Saruh vap – Khawmual leh lui sa ruh tinreng, Artui kâwr chenin hàl hnu-ah chhutdip a nuam a. Chhut dip hnu thlai bula kan theh/lei nên chawhpawlh khan leithûr a tidài (neutralize) chauh a ni lova, thlai chaw pawimawh Calcium leh Phosphorus a supply nghal – thlai rah duhna.

4. Dry matter mulch – Tawih thei thil ro engpawh hmanga thlai bul kan khuh hian, hnâwng (moisture) a siamsak mai bâkah, zawi zawia humus insiam a thlentir. Humus hi lei thûr leh al control kawp theitu, nature kalphung pangngai a ni. Organic matter tawih hian humus a siam thin.

5. Thuk-vut – Sodium & Potassium carbonates a pãi tam a, minerals dang a keng nual bawk. Thlai bula thehdarh chi tho a ni. Lei thûr a siamrem mai bâkah thlai chaw mamawh a supply tel nghal nual bawk. Thei rah tithlumtu hi Potassium, thuk-vutin a ken ber hi a ni a. Potassium hi thlai taksa chhunga enzymes 40 chuang thununtu a ni bawk.

Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy