Daily Newspaper

BASICS IN AGRICULTURE – XLI

617

Kumin 2021 ruahtui kan dawn dan hi thlai chingtute tân chuan a la beitham hle a. Chutih laiin hlo erawh (thlawhhmaah) a awl phah rih deuh thung. Zung leh bul nei sa an chawr buk thei a, hlo chi erawh a la tiak lian rih lo khawp mai, ruahtui ringho chu. Hnim a duah theih loh chuan thlaite pawh an duah mawh khawp thin. Hetih lai hian khawi kipa hlo-tûr kan hmang uar leh lutuk hi ngaihtuah chian a tha  hle. In leh a vel hnim, kawt kobang leh lungrem nên lam hlo-tûr hmanga kan hawl thla zen mai hi chu…Awlsamna kan zawn luatah hian kan la intichhe thei maiin a rinawm. Mi tam berin kan hman uar chu tum bik nei lo (Non selective herbicide) Glyphosate leh hlo chi thah bik nei Butachlor hi niin a lang a.

HLO-TÛR HI HMANG FO TUR KAN NI EM?
Kan sawi fo tawh a, Fur lai a nih miau avàngin sawi nawn fo a ngai – hnim chungchang hi. Huan lo ramah ngat phei chuan, thlai kan dah mumal lohna lai leh hmun awl laite chu lo hnim mai mai rawh se. Pathianin Tropical leilung a duan dan chu hi hnimin a khuh reng kha a ni tlat a. Hnimte hian ruahtui, tuihâwk leh nisa-in leilung a sawisa rethei lutuk tur kha an vêng a. Thlasika an thi ruang, fur ruahtui tam laia tawih hi lei nunna insiam thar tur tân LOH-THEIH-LOH a ni! Tin, thilto tinrêng that vek thei Glyphosate hman leh hman loh chungchângah inhnialna a tam hle. Mahsela, Glyphosate hman fo tawhna hnu chu hmun awihtlan vak lo pawh a lei a thûr chak hle. Hemi awmzia chu tawih dan dikin hnim a tawih lova, hnim zung a chiah mawih a, lei a thâwp a, lei chunglâng a kalral nasa mai mai lek a ni. Tin, leimin leh lei tlabal a thlen duh hle bawk. Hnim control hi kumkhat hna emaw kan ti a nih chuan, kan tisual a ni – long term policy tur zâwk mawle. Kumina leilung kan enkawl dan hian nakum hnim awmdan tur leh a piah lam zel leilung awmdan tur a hril miau a ni. A thuhrimin, Glyphosate hi cancer thlen thei thil (carcinogen) chi khat a nih miau avàngin kan hmang a nih pawhin fimkhurpui hle a ngai e.

Mi tam takin farming hi factory emaw tiin, thlai tharchhuahna machine leh pawisa siamna khawl emaw kan ti fo. Chutiang lek atân chuan a uihawm lutuk tlat. Pathian rawng kan bawlna, thilsiam dangte kan enkawlna, Mother Earth nêna kan inzawmna kàilawn a ni zâwk! Hlawk phut tum tan chuan farming hi kalna chi a ni lo, day by day-a thilsiam dangte nêna kan inkâr siamremna hmun a ni zâwk e. Leitha pangngai tak, Natural soil kan tih-ah hian, hrik te tak tê tê, mit-lâwnga hmuh tham loh (microbes) hi 1 gm lekah pawh 100 million an awm a. Rannung leh thilto pawh chhiar fê tham an awm. Heng nunna nei dangte ngaihtuah chang lek lova thlai chin hi, tun millennium atân hi chuan, risky/vulnerable veng veng tak a ni. Kan duh angin thlaite lo thar tehreng pawh ni ila, chemical kan barh nasa si a, a ei tlâk tak meuh ang maw? Mihringte kan lo hrisel theih nan hian thlai mawihnai nge pawimawh thlai tuihnai?

NATURAL FOREST DIM RAWH
Farming hi thluak hman fê ngai thil a ni a. Mi tihdan leh thlai chin copy lui luina tur hmun a ni ber lo. Mi thlai chin loh ang chin hi market lamah a buai har zâwk rih, local market chauh kan ban pha a nih chuan. Natural Forest hi Siamtu Pathianin kan leilung awmdan tura a duan dan kan zirna tura Natural demonstration Farm a ni a. Zirchian a, chhui fê tham thil a tam khawp ang. Thlai rál kan tih tam tak hi ramngaw-ah an cheng a. Chutah chuan, eiraltu chi hrang hrangte control-na hnuaiah balance tâwk lêkin an awm a. |ul lovah ramngaw kan tikàng vak vak a, thlawhhma atân kum tin kan vat chereu bawk. Mihring lo pung zel leh mamawh lo sang zel hian thing leh mau kan suat nasa hle bawk. Hetiang a nih chuan, kan rama natural forest kan neihte hi a ral zel ang a. Ramngaw-a rannungte chuan kan hmunhmaa kan thlaite an rawn beih tam phah zel ang. Sik leh sa, tuihna leh pest management-ah kan buai phah deuh deuh ang. A sawhkhâwk kan tuar nasat fê hnu-a kan harh chauh a nih chuan kan nasa lo hle ang. Chhungkaw pakhat chãwm tura hmunhma kan mamawh zauzawng hi kan quality inennna tur darthlalang pawimawh tak a ni. ‘Farmer remhriatna’ aia ‘farming area’ tihpun hi income tihsànna emaw kan ti tlat a nih chuan, kan ram hian tawrh hun a la nei ngei ang.

KAN RAMA AWMSA THEIKUNGTE HI?
Hnam fing apiangin mahni rama awmsa resource an humhalh thiam a, khawvêl dang mithmuhah an chàwi lãr thiamin, sumah an chantir thiam thin. Keini chuan Cameroon Theihai ngat kha kan ngaisang a, kan changkàn tum dan hi kawng a bo deuh em? Foreign leh Phai vai thlai tiak hlir kan phun a, kan neihsa hlut nachâng reng kan hre lo a nih chuan, kan rama lo dahsa diamtu Siamtu Pathian a zahawm lutuk lo’ng maw? Kan hmarchatê, thak vîn tak mai, ‘Bird’s eye chili’ pawh Naga hovin an patent hmak a ni lo’m ni? Kan tualto theikung neihsa – Bil, Vawmva, Theiarlung, Theipui, Pangkai, Hrei-râwt etc-te hi rah hma tur leh tui zâwk, îtawm zâwka siamchhuah dan tur hi tu mawh nge ni ta ang? A nihna takah chuan a awm tam lohna hmunah thlai hi a hlu a ni mai a. Kan ram tualtote, engah mah kan ngaih loh hi ramdang, a awm ve lohna hmunah chuan, a hlu viau thei ang em? A nuitrient content analyze atanga value addition leh marketing ideas thlengin…thil challenging tak a ni ngei ang. Line deptt (Forest Deptt kan tih mai) hian a chi atangin thei chi hrang hrang an kui tiak a. Mahsela, a rah har a. Tin, fruit lam kha an êm lutuk lo niin a lang, afforestation lam hawi deuh an ang zâwk mah a.. Ramdang atanga lakluh leh kan ram atanga thawnchhuah hi kan balance thiam a pawimawh e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy