Daily Newspaper

BASICS IN AGRICULTURE-XLIV

366

Buai namén lovin Covid hripuiin min nuai buai a, a thim zawnga thlir phei chuan ngaihtuahna a tawi tup maiin a rinawm. U leh nau, chhungkhat leh thian tha kan chân a. Nimahsela, keimahni êm kan la thi lova, kan la chesawn thei a nih chhung chuan, tu-emaw tân, ram leh hnam tân kan la chhenfâkawm thei êm êm a ni. Kan tun dinhmun chu engpawh nise, hma lam hun chu a eng zawnga thlir luih tlat tur a ni. Chu chuan, Hringnunah rah tha a chhuah nge nge thin. Thlai chin leh enkawl dan chungchângah pawh, lockdown hi ngunthlûk zâwka thil tangkai ngaihtuah chhuah nân, hmasãwnna rahbi tuk nân, kan tih theih tâwk thil remchâng tih nân hmang tangkai ila, kan hlâwkpui ngei tur a ni, he natna hi!

HMUN ZIM ZAWKAH, HAUTAK ZAWKA HMA LAK
Thar tam loh hlauvin, tlangram awih pangah ramngaw kan vãt duai duai a. Kumtâwpa kan sawma pakhat en chuan kan lo thawkchhuak tam leh mang miah si lo, Singapore housemaid pawh kan lo tluk lova! Hma kan lâk zauh avàngin duh angin kan enkawl sêng lova, khawvêl dangte khaikhin phei chuan, khawsak han tihsànna tham rêng a awm thei lo! Heti hian kum a ral a, MLA term a ral a, kan pi leh pu, nu leh pate an ral a – keini pawh hi kan la ral dawn! Hei hi kan duh lo a nih chuan, kan rilru leh tihdan kan thlâk a ngai, kawng dang a awm lo. Ka anpui, thingtlang leh khawpui kuthnathawktute zingah, RULING PARTY nih hi dinchhuahpui tum leh châk tlat an awmin ka hre thin, he hri hi Covid ai pawhin ka kham zâwk! Thawhchhuah nei lo, fashion tuihnai âtchilh leh lirthei changkanga vâk vêl t?hinte hi zak lo taka khawlai an lêng vel ngam a nih chhung chuan, engtikah mah he ram hi a dingchhuak lovang e! South Korea, Israel leh Japan ram dinchhuah nana thalaite chêt dan nên dan nên a inpersan êm mai!

Hmunhma nghetah, Bawngtuthlawh vawikhat pawh cheh thlawn awm lohnaah, midangte chin loh ang thlai chinga bur chat hi tun dinhmunah chuan a fuh zâwk. Pesticide tinrenga enkawl, phai atanga kan thlai lakluhte hi kan rama kan thar ngei, organic ngat hmanga thlâk a hun takzet. Vaiho leh hnamdangte hian sum bawmah min hmang rei lutuk tawh. A market pawh a awm – Mizo tomato thar atangin a hriat. Duhthlan tur dang kan neih chuan loh avàngin Phai thlai kan hnualsuat thei lo mai mai alawm. Thingtlang kilkhâwr leh tlang pang awih tên atanga foreign market thlir hi a advance lutuk, kan ban pha tak tak lo. Kan tu leh faten la buaipui ang hmiang, chutianga hman tlâk turin leilung enkawl hi fimkhur ila. Keini erawh chuan, vawiina kan ram mamawh hi i buaipui rih teh ang u…

LEAF LITTER VERMICOMPOST
Hmunhma zim zâwkah, kumhluna thlai engpawh i ching dawn a nih chuan, i mamawh hmasa ber leh tam ber chu leitha a ni. Company siamsa organic leitha emaw ran-êk emaw i hman dawn chuan, a man a to dawn ropui mai si a, tin khat hmun lek enkawlna tur pawh. Engtinnge kan tih tak ang? Issue hmasa lamah kan hmunhmaa leitha luangral tur vênna lam kan hrût nasa tawh a. Kha kha kan ngai pawimawh a nih chuan, step khat i la bâk e – changpãt khawi ang le! Vai leitha chuan leilung a sawisa rethei thin a, a daih rei bawk si lo. ‘Bâkah kan hmanna hmun azirin a kalral nasa thei ropui si…a hming lah hi Zopa tân chuan hriatthiam a harsa hlawm bawk nên! Khawnge…Tlawm ve ngai lo Pasaltha Khuangchera leh Lalnu Ropuiliani chi leh kuangte hian tharum i han thawh tak tak ang hmiang mawle..

1. Changpãt khawina tur, a bika siam silpaulin hi, market-ah lei tur a awm tawh a. A remchan loh pawhin tuipuan leh silpaulin pawh a hman nawk nawk theih. Box type niin, 2000L capacity vel a ni tlangpui. |umkhatah tin 100 vel a thar theih a nih chu.
2. Leiah an nghat a, a pang an phuar mar a, a chung zar bâkah a awmna kha tui tling thei lova kàwm (drainage) rih a ngai ve a. A chung hi zau tak zar tur a ni, ruah theh leh nisa em hi changpãt-in an ngai thei lo. In luma siam lovin, a hmanna tur hmun, huanah siamchilh khan thiar vel a awlsam ang a.

3. A chhuatah ramhnuai lei, 2 inch vela chhah kan chhung phawt ang a. A chungah chuan changel chansawm leh bawng-êk chawhpawlh (6 inch aia chhah lo) kan chap leh ang. Hei hi Nature Vel (SW) leh tui chawhfin (5ml/L hisáp)-in kan theh thet thet ang, a titawih hmatu atân.

4. A chungah chuan hnim hring chansawm leh hnahthel ro chansawm (1:2 ratio) inches 6 vel kan chap leh ang a. A chungah changel chan sawm 2-3 inch kan dah leh ang. Hetih pah hian – alu kawr, balhla kawr, Dragonfruit leh apple kawr ang chite (kitchen waste) kha chansawmin kan thehdarh bawk ang.

5. Kan huan sàmna hnim hring (1 part) leh vau hnahthel ro (2 part) chansawm kha, a chungah dah lehin… Items kan dah thar apiang hi Nature Vel (SW) leh changel chansawmin kan chhilh zel ang a. Kan unit a khah hma chu kan dah khat zel ang. Tichuan, chawlhkar khat kan nghâk ang a, ni 2/3 danah kan chawklet zeuh zeuh ang.
6. A chhung kan zen chhin ang a, a sa ta lutuk lo ta tih veleh changpãt khawi chi (Eusenia fetida) kan chhuah ang a. Changpãt kan chhuah hma hian kan thil chhehvum kha (a mawng thlengin) thing bungin a tam thei ang ber kan hawlh kaw thluah ang a. A ro lutuk chuan tui kan theh ang a. A chunglâng berah changpãt êk mûr a rawn insiam hma chuan, sawhchiar rum tak ang vel hian kan tihnâwng reng tur a ni. Changpãt chhuah hnu-ah chuan, changel hnahin kan chhin ang a.

7. Chawlhkar tin vawikhat kuta chawh-leh pahin kitchen waste chansawm kan neih ang ang kha, tlem tlemin a telh theih reng bawk. A chunglángah changpãt êk mûr a lo insiam khan kutin emaw dìm takin (changpãt tel lo turin) kan rût khawm ang a, kan la chhuak zel ang a. Field-ah a hman nghal char char theih tawh ang. Hetih pah hian hnim hring leh ro chansawm kha changel kung no chin chansawm nên kan telh hlek hlek zel ang. Hetia items thar kan dah luh hian, kan hai khuar hlek ang a, kan items thar kha kan phum pil chang chang zel dawn nia.

8. Hetih rual hian daihlimah vau hnahthel ro, huan sàmna/thlawhna hnim chansawm leh changel kung no chansawm kha kan up lâwk zel ang a. Vermicompost kan lâkchhuah apiangin tlem tlemin kan dahlut reng ang a. Changpãt chhuah atanga thla 4/5 ral hnu-ah chuan vermicompost quintal tam tak kan thar thei tawh dawn a ni. Issue leh-ah, next Monday-ah hetianga vermicompost siam that bikna kan thlirho leh dawn nia.

Changpãt khawina tur, Vermicompost bed siam sa, 12ft x 3.5ft x 1.83ft.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy