Daily Newspaper

BASICS IN AGRICULTURE – XLVI

91

Favang ruahtui kan dawng tha chho dawn niin a lang a. Tam hleihluak lovin Mizoram hmun hrang hrangah ruah a sur tam chho tan niin a lang a, Pathian malsawmna ropui tak a ni phawt mai. Basics in Agri – XIV-ah khan ramhnuai hnahthel leh Fur hnim hmanga Vermicompost siam dan kan sawi tawh a. Kha kha khawi hmunah pawh kan tih theih leh Fur laia thlasik thlai chinna tur leitha siam lam lo inbuatsaih dan tha ber pawl a ni a. Vermicompost that bikna lam tun tum issue-ah chuan kan thlur deuh dawn a ni.

1. Nature kalphung zulzui a ni – Thlawhhma nei thinte chuan kan hria ang a. Sadai-êk (natural vermicompost) tamna leilung chu a ram a tha thin. Hetih lai hian changpâtte hi chi hrang hrang an awm a. Lei pawnlânga khawsa chite, lei chhungril deuha khawsa chi leh organic matter tawih kára khawsa chite pawh an awm a ni. Lei chhungril deuha khawsa changpâtte chuan Kel-êk ang tak lei pawnlângah an rawn e chhuak thin a. A len pawh an lian deuh. Lei pawnlânga khawsa thinte chuan êk mûr sîn tê tê chauh an nei a. Hnahthel hnuaiah an êk mûr an chapparh thin. Changpãt hian nisa leh lum an tithei lo hle a, lei pawnlânga khawsa chite hi chuan kum tluana ni hmu mang lo, kawr kam leh Thing ngaw hnahthel tlakhawm hnuai an lawm a. Ruah a surin a nawr chhuak ngai mang lo. Lei chhungril deuha khawsa thinte chu khawi hmunah pawh an awm thei a. An kua ruahtuiin a hawrh avàngin an rawn vâk chhuak fo thin. A len pawh an lian bik deuh. Tichuan, changpãt chaw heh deuh species (Red worm ang chi, inches ¾ leka sei, nawhalh kuang tiat lek lek, an pun chak leh chaw heh vànga an khawi uar tâk) hmanga hnim leh hnahthel ro leithaa chantir hi Pathianin khawvêl kalphung tura a duan a ni a, belhchian a dawl bik ngei ang le!

2. Vermicompost-a thlai chaw awmte hi thlai tâna ei nghal mai theih (soluble form) ni siin, thlaiin an ei zawh nghal mai theih lohte tuiin a kalralpui (leeching) theih loh turin oil chi khatin a tuam a. He oil/membrane hi changpãt kawchhunga Siamtu dahsa kha a ni. Oil layer kha zawi zawiin a ral a, hei hian thlai chaw kha a tâwk lekin a release ta thin a ni. Hei vang hian compost leh ran êk tawih dur ai pawhin a thlanawm zâwk hle a ni, thlai chaw kal ral thu-hlaah ngat chuan. Tin, amah hrim hrim hi organic matter a thahnem tham a. Hei vang hian microbes tha chite an tam êm êm a, a NPK ratio hniam ang ngawta ngaih hniam chi a ni hauh lo mai le!

3. The Ohio University-a, Soil Ecology laboratory chuan kum tam tak an lo zirchiannaa an hmuhchhuah chu – vermicompost hian thlai chi tiah thattir, thlai than thatna, par leh rah thahnem siam turin a thawhhlâwk hle tih hi. Hei mai a ni lo, thlai kung leh zung tawih natna te, thlai kung vuai thi ringawt ang chi bâkah rannung chimawm – mites (Maimawm sîn chi), aphids (behlawi zîk bawm khat lûk thinho, thlai dang pawh an bei, virus an pudarh thin) leh Mealy bug (Khumfa lian deuh, rawng var at?anga a sen thlengin an awm, buh zung leh tomato kung ilova awm thin Kumthu lam chi hi) thlengin a veng thui hle. Kum 2011 khan, Cornell University-a, Deptt. Of Plant Pathology & Plant Microbe Biology researcher-te chuan, ‘thlai tiak lâwng thin (Damping off) hi changpãt-êk/vermicompost hian a veng’ an ti hmiah mai! Vermicompost mai ni lovin, a tui (vermiwash) chauh pawh hian vegetable thenkhatah chuan 50% thlengin a tharhlawk phah niin US Department of Agriculture chuan a sawi hial. (https://www.pennington.com/all-products/fertilizer/resources/earthworm-castings-all-the-goodness-without-the-goo)

4. Hetianga ramhnuai hnahthel ro leh huan hnim hmanga vermicompost kan siamte hi chuan, Humus/Organic carbon a pai tam hle dawn tih a chiang a. Leilunga Organic Carbon tam hi UNO pêng pakhat, Food and agriculture Organization (FAO) pawhin ‘Tharhlawk theihna Thurûk (Hidden Potential)’ a tih hial kha! Vermicompost kan siam tam a, kan hman tam poh leh tharhlâwk turin Potential kan nei tha tihna a nih mai chu. Humus hi neutral a ni a, lei thûr lutuk emaw al lutuk a siam rem kawp thei. Tin, leiin tui a pai tam phah a, tui pek ngai a titlém a, hna a save-in hnim thlengin an tlem phah bik hle a ni. Lei nihphung dik lovah chuan thlaite chaw leh tui pe chiam chiam mah ila, a kalral a tam a, a thawk ropui mawh a, natna leh râl a tam a, sum leh tha sèn thlawn a awl bik êm êm a ni.

5. Tropical Soil buaina ber pakhat chu hnim enkawl hi a ni. Mahsela, hnim nihphung hi chîk tham a awm. Lei chhia apiangah hnim a bit a, thlawh fai hnu pawhin hlo ngai a to nawn chhên thin. Lei thûr hi Mizorama hnim enkawl tibuaithlâktu ber a ni àwm e. Vermicompost/Vermiwash hmanna leilung chu a lei a thûr lova, lei a that miau bawk avàngin hnim an duah tha nã a, an bit ve lo. Tin, thlawh faiin hnim a inthlâk mai thin bawk. Tin, vermicompost hian Organic matter a pai then teuh avàngin tropical biomass demand kha a chhâwk zangkhai teuh a ni. Farmer zawng zawngin kan hriat tur pawimawh chu hei hi a ni : Ram lum (Tropical area)-ah i awm a. I huanah khan metre khat bial zêlah hnim hring, rêp ro hnu-a 2kg tling tham vel tur a to emaw hnim ro 2kg hû a mut reng a ngai. Hemi tihlawhtling tur hian Nature chuan hnim a rawn chhuah a! Leilung hi renewable resource a ni a, mahni in-renew theihna power a nei a, a tum bawk thin. Hetiang a nih loh chuan, lei kha a chhe telh telh ang. A awmzia chu metre khat bial zel-ah khan organic matter 2kg a awm chuan, hnim a tam vak a ngai tawh lova, a rawn chawr tam tawh lovang, lei quality a chhe hle a nih loh chuan. Metre khat bial zêlah organic matter ro (2kg) emaw thlai hring (rêp ro hnu-a 2kg tling tâwk vel) i neih chuan, hnimin buaina an thlen tawh lovang che. Tropical soil khan in-tun-nun nân organic matter a demand che a, hei hi i pêk chuan, insiamrem a mamawh tam tawh lova, hnim a chhuah tlêm ang. Hei hi kan ngai pawimawh lo a nih chuan, kan huan leilung hian dam ni hmel a hmu ngai lovang a, chu chu kan thlai-ah a rawn lang chhuak fovang. Tin, chemical fertilizers hian leilung a tuamdam thei lova, reilote chhung chauh thlai a pui a, leilung erawh a tirethei a ni!

Photo : Theibuhfai hnah no khâwrtu rannung hi a bi bula Tulsi phun hian a hnawt bo thei.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy