Bawlhhlawh hmang tangkaitu Indore
Madhya Pradesh-a khawpui lian tak, Indore-ah chuan bawlhhlawh leh hnawmhnawkte pawh tangkai takin an hmang a. Tun hmaa bawlhhlawh an paih khawmna thin hmun pawh thian fai vek tawhin, huan mawi tak, mite len khawthawn châkna hmunah an chhuah tawh.
Bawlhhlawh an paihkhawmna hmun hi waste management mumal tak an kalpui atang chuan a tangkai tawh lo va, tunah chuan an bawlhhlawhte chu tuialhthei atan thil dang atan an hmang tawh.
He khawpuiah hian bawlhhlawh paihna hmun awm tawh lo tur leh bawlhhlawh awm lo turin hma an la a, khuarel tana hnawksak ni si lovin bawlhhlawhte chu tihriral leh tangkai zawka chhuah dan an dap a. Tun lai thiamna hmangin an bawlhhlawhte tam tak zinga plastic lo awmte chu tuialhthei (fuel)-ah an chantir tawh.
Indore-a an Municipal Commissioner Ashish Singh chuan bawlhhlawhte hi a tawih ral thei leh thei lovah an then hmasa a, hei hi chhung tin an thliar feltir lawk a. Heng bawlhhlawhte hi khawpui chhunga hmun 10-a bawlhhlawh chhekna tur (nodal point) an siamah dah khawm leh niin chuta tang chuan a sawngbawlna tur, trenching ground an tih an panpui leh a. He hmunah hian tawih thei lote chu sawngbawl a ni.
Heng bawlhhlawh tawih thei leh thei lote hi tangkai zawka hman leh theih turin an sawngbawl vek a. Indore Municipal Corporation chuan environmental consultancy agency thawhpuiin interlocking tile, diesel, petrol leh gas-ah an chantir leh thei a ni.
Plastic bik, hman nawn thei (recyclable) leh nawn theih loh (non-recyclable)-te chu fuel atan an hmang a, generator-ah pawh an hmang niin diesel plant operator Sudhir chuan a sawi.
Non-recyclable plastic zinga a zahve (50%) vel zel chu eirawngbawlna tur fuel atan te an hmang a. Diesel, petrol leh gas atan pawh an hmang niin a sawi bawk.
Bawlhhlawh hmang tangkaitu Indore
