UD&PA changtu deputy chief minister Tawnluia chuan Inrinni khan Khawzawl Darngawn ram, Pengpui tlanga bawlhhlawh sakhat sawngbawlna tur, Solid Waste Management Centre sak mek a tlawh a, hnathawh tawh dan leh hmabak chhunzawm dan turte a enfiah a, hemi hnu hian Khualen khua a tlawh bawk.
Solid Waste Management Centre dinna tura hmunhma buatsaih hrang hrang thawh zawh tawhte bakah puitlin a nih theih nan ruahmanna siam a nih thu deputy chief minister hian sawiin, financial year tharah UD&PA department kaltlanga hmalak chhun-zawm tum a ni tih a sawi.
“Khawpui a than ang zelin kan khawsaknain a kentel bawlhhlawh pawh a pung a, mumal tak leh awmze neia sawngbawl a pawimawh tawlh tawlh dawn a ni,” tiin, khawtlang tana rotling leh chhawr tangkai tur a nih avangin ngaihpawimawh a ni tih a sawi.
Khawzawl Darngawn-a Solid Waste Management Centre sak mekna Pengpui tlang ami hi Darngawn Village Council-in UD&PA department hnena an pek a ni a. Special Central Assistance 2020- 2021 sum, nuai 60 senga siam tur a ni. A tih changtlunna’n hian kawng hrang hrangah land development tih tawh a ni.
Kawngpui atanga a hmun panna kawng chu RCC-in siam zawh tawh niin, internal road siam a ni tawh a. Main gate, bawlhhlawh tawih thei leh tawih thei lo thliarhranna – Segregation Platform, site office leh RCC tuizem litre 27000 dawng siam tawh niin, a hungna siam a ni tawh bawk.
Deputy CM hian Khualen khua a tlawh nghal a, vantlang inkhawm neihpuiin khawtlang mamawh leh tulte sawi ho a ni.
Bawlhhlawh sawngbawlna tur en
