Kolasib Dihmuntlanga Solid Waste Management Centre dinah bawlhhlawh paih leh sawngbawl kawngah management a fel tawk lo tih chu UD&PA department pawhin a pawm a, hma an la mek tih an sawi.
MJA Kolasib District-in Solid Waste Management Centre, Dihmuntlang an tlawhnaa an thil hmuh dan an taran hnu ah Zirtawpni khan UD&PA director Andrew H Vanlaldika chuan Kolasib MJA member-te a kawm a. Kum 2011 atangin Solid Waste Management Centre hi bul tan a ni, tiin, a siam nan hian cheng vaibelchhe 7.08 hman a ni a. A building leh thil dang tha tak a awm laiin, hnathawhna tur hmanrua erawh a la changtlung tawk lo tih a sawi a, hei hi hmalak mek a ni tih a sawi.
MJA Kolasib District-in SWMC an tlawh tuma an thil hmuh an puanzarah management a fel tawk lo tih chu an ni pawhin an pawm a, ruahmanna an siam tih sawiin, Mizoram pum atan ruahmanna hi siam a ni a, hmasawnna pawh a awm chhoh thuai an beisei tih a sawi a ni.
MJA Kolasib District hian UD&PA director hnenah SWMC atana an ngaimawh hrang hrang an thlen bakah Kolasib khaw chhunga faina lam kalpui dan thenkhat siamrem ngai nia an hriatte an lo thlen bawk.
Bawlhhlawh sawngbawlnaah management fel tawk lo pawm
