Hindu pawl pakhat Shankaracharya of Jyotirmath Peeth-in hmarchhak state hrang hrang leh Mizoramah bawng talh lo tura beihpui thlak an tum chu Mizo Zirlai Pawl chuan duh loin a dodal a, September 27 khan he pawl member-te hi Lengpui Airport an rawn tum tih hriat niin, MZP hian hma an la a, airport atang hian an thlawk haw lehnghal nia sawi a ni.
Kumin September 24 chhuak The Aizawl Post-a tarlan tawh angin India ram pumah bawng sa ei tihtawp a, bawng humhalh duhna lantir tuma hma la mektu, Hindu sakhaw la run pawl zirtirtu pakhat – Shankaracharya Swami Avimukteshwaranand hnuai amite chuan India ram pumah bawng talh khap a nih theihna turin ‘rally’ buatsaih an tum a, state leh union territory tin fanchhuaha tlangaupui an tum a. Tunhnaiah hmarchhak state pawh heng pawl hian hrutin, state tina rally neih an tum chungchang hi an sawi a. Nagaland leh Meghalaya-ah chuan anmahni dodalna hi nasa taka lantir zui a ni nghe nghe.
‘Gau Dhwat Sthapana Bharat Yatra’ tia vuah bawng talh khapna dan lekkawh tura nawr tumna hi Shankaracharya Swami Avimukteshwaranand thuihruaite hian Aizawlah pawh huaihawt an tum a. An thuken tlangaupui tumin September 27 khan private thlawhna an ‘hire’ hmangin Lengpui Airport an rawn thleng. MZP Gen. Hqrs. chuan hemi chungchangah hian an duh loh zia thuchhuah an lo siam tawh avang leh an dodal dawn tih an hriat avangin an thlawk let leh niin an sawi.
Hnamdang pawl thenkhatin Mizoramah bawng talh lo tura mipui hrilhhriat beihpui thlak an tum hi MZP chuan engti kawng mahin a pawm ngai dawn loa, hetianga hnam nunphung khawih thei thil inzirtirna rawn neih an tum hi nakin zel atan a him a ring loa, an chet vel dan uluk takin a chhuizui zel dawn tih sawiin, Mizo mipui pawh hetiang hmalakna lakah fimkhur a, lo bengkhawn lo turin a ngen tih a sawi.
Shankaracharya pawlte hmalakna hi North East Student’s Organisation-a MZP thawhpui North East-a zirlai pawl hrang hrang pawhin an dodal tih MZP hian a sawi a ni.
Bawng humhalh tlangaupui tumtute tlan haw lehnghal
