Bawngkawn-Leitan kawng chei dawn
Bawngkawn leh Durtlang Leitan inkar kawng chei leh khawthlir siamna tur enfiahin Inrinni zing khan Urban Development & Poverty Alleviation minister K Sapdanga hoin a kaihhnawih sawrkar hotute leh khawtlang hruaituten an en ho.
Bawngkawn Junction atanga tanin Durtlang Leitan thleng kea kalin enho a ni a. Project design siamtu, SEeDS Architectural Consultancy Services principal architecture Lalruatkima Hauhnar chuan an design sawifiahin poster presentation a pe nghal a ni.
UD&PA minister chuan he project hi kawngpui tih zauhna tur ni loin, a awmsa tangkai taka hman leh cheimawina tur chauh a ni tih a sawi a. Hnathawhna tur sum pawh sanction vek a ni tawh a, hna thawh tan thuai theih niaa a rin thu a sawi a ni.
Tluang taka hna thawh a nih theihnan kawngpui hnaiha awmte chu tha taka indawr pui a, kawngpui huamchin chu lo kian ngei tura beisei an ni tih a sawi a, chutihrualin kian duhlo lui tlat an awm a nih chuan dan kenkawh pawh a ngai dawn tih a sawi a ni. He project rual hian Leitan lian leh Synod Hospital bul, Leitan te inkar pawh karleh atanga lirthei kal theiha siam tum a ni tih a sawi bawk.
UD&PA secretary Lalmalsawma Pachuau sawi danin, SASCI Part-XIII (Urban Planning Reforms) hnuaiah he hna hi thawh tur a ni a. Cheng vaibelchhe 15 sanction niin, tender chhuah mek a ni. Project design hi architectural competition hmanga thlan a ni a, endik tu atan pawh architect hrang hrang, Mizoram University leh state PWD a an chief architect-te an tel tih a sawi. A final design hi UD&PA minister leh project huamchhunga local council-te leh bialtu corporator hoin, inrawnkhawm chunga pawm a ni tih a sawi a ni.
Bawngkawn-Leitan kawng chei dawn
