Serchhip district bawrhsap, Competent Authority for Land Acquisition (CALA) ni bawk Paul L Khuma chuan August 30 khan Chhiahtlang, Chhingchhip, Khumtung leh Baktawng Chan In tlawhin, National Highway 54 kawngpui siam mek dinhmun a en.
CALA leh a team-te hi national highway kawngpui zauh hna enkawltu NHIDCL hotute leh contractor-te bakah khawtlang hruaituten an lo dawngsawng a. Mimal leh pawlin harsatna an neih leh tunhnai ruahsur nasa avanga hnathawh khaihlak dan a hmunah an en a. Contractor-te hian an thawh tawh chin dinhmun leh harsatna an neih, an thawh chhunzawm zel dan tur ruahmanna an lo hrilh a ni.
NH-54 kawng siam meka Serchhip district chhung – Chhiahtlang, Chhingchhip, Khumtung leh Baktawng Chan Ina kawng la siam zawh loh leh tunhnaia ruahsur nasa avanga harsatna awm chu bawrhsap hian a tlawhchhuak a. Kawng siam hi zawh thuai a nih theih nan chak taka hma lak a nih lai a, kawng siam ti khaihlak thei thil awmte a hmunah enin, harsatna neite pawhin an lo thlen bawk.
National highway siamthat leh zauh hna thawh mekah harsatna awm leh a chinfel dan tur ruahmanna sawihoin vawi engemawzat thutkhawm a ni tawh a. District administration tirhin kawngpui siam mek endikin vawi engemawzat vah chhuah a ni tawh a. August 30 kha bawrhsap ho hian fehchhuak leh niin, thutkhawm hmasa lama hmachhawp an neihte hlenchhhuah a ni em, tih a hmunah an en a, contractor-ten hna an zawh hun tur siam felpui nghal an ni.
Bawrhsap hoin kawng siam mek en
