Lawngtlai district bawrhsap thar Joseph H Lalramsanga chuan Thawhtanni khan a pisaah Mizoram Journalists’ Association member-te a kawm a. Inthlan felfai, thianghlim leh langtlang a awm theih nan a tul apiangah mipui kaihruaia finchhuah kawngah thawhpuiah a sawm.
Lawngtlai district-ah MLA inthlan tha taka kalpui a nih theih nan kawng hrang hranga inbuatsaih a nih thu bawrhsap hian sawiin, inthlan felfai leh langtlang kalpui turin leh mipuiin an duhthlanna zalen taka an hman theih nan thuthar thehdarhtute chu thawh ho puiah a sawm tih a sawi a. Election Commission of India-in inthlan kalpui dan tur inkaihhruaina fel tak a siamte rintlak zia mipuiin an hriat theih nan District Election Office-a hmalakna hrang hrang hriatpuitu ni turin MJA member-te a chah. Mipuite zirtirtu ni tur leh a tul apiangah sawrkara mawhphurhna neite finchhuahtu ni turin a chah bawk.
MJA Lawngtlai District president Lalngheta Ralte chuan MJA dinhmun leh an hnathawh dan sawiin, district bawrhsap apiang chu MJA patron atana an ruat thin thu a sawi a. Hemi ang hian bawrhsap thar hi patron-a ruatna an hlan nghal a ni.
Bawrhsap leh MJA inkawm
